Cas Blanco a anuncia dialuna reglanan nobo di entrada pa stranhero cu yega e pais cu avion, entrante november awo: nan mester ta completamente vacuna y ademas mester mustra prueba di vacunacion prome cu nan por subi un avion rumbo pa Merca.
Ademas, e biaheronan internacional mester ta parti di un programa di control y entrega un test negativo, tres dia prome cu nan biahe pa Merca.
E reglanan aki lo drenta na vigor na november, asina e coordinado di prensa di presidente Joe Biden, esta Jeffrey ZIents a informa.
“Nos ta moviendo den e sistema global aki hopi mas estricto, pa cual nos lo tin un enfoke coherente den tur e paisnan, y cu ta exigi di e ciudadanonan stranhero pa nan ta vacuna, demostra cu nan ta vacuna y despues pasa den e testnan y e regimen di control,” Zients a bisa.
E anuncio aki ta pa 33 pais riba cual tabatin un prohibicion di biahe pa Merca.
Esaki ta un suavisacion di e restriccionnan imponi pa prome bes bou di gobierno di expresidente Donald Trump na inicio di e pandemia di coronavirus. Tambe e ta un representa un canmbio significativo den e medidanan poni te na e momentonan aki door di Gobierno di Biden.
E Mericanonan no vacuna cu ta pafo di e pais y cu ta desea bolbe nan cas, mester cumpli cu e rekisitonan di test mas estricto.
Nan mester test negativo riba e test di coronavirus un dia prome cu nan biaha pa Merca y mester bolbe haci e test despues di yega.
Dentro di corto Centro pa Control y Prevencion di Malesa (CDC pa su abreviacion na Ingles) lo saca un ordo na e aerolineanan indicando cu nan mester recoge number di telefon y email di e biaheronan pa un sistema nobo di contact tracing.
Despues di esey, autoridadnan lo sigui e biaheronan for di momento cu nan yega pa mira si nan ta presenta sintomanan di e virus.
Zients no a specifica cual vacuna ta califica y kico ta considera un persona completamente vacuna. El a sigura cu e detayenan ey lo wordo splica ora cu CDC publico e orden ariba menciona pa biaheronan internacional.
E politico nobo ta splica solamente pa e biaheronan aereo y no pa e crusamento di frontera terestre cu a cera pa biahenan no esencial for di Canada y Mexico.