AMSTERDAM, Hulanda- E regulador di bolsa Mericano SEC a informa ING cu nan lo no tuma niun medida contra di e banco. E regulador a cuminsa un investigacion den e foutnan cu e banco a haci cual lo haci cu e criminalnan lo por a laba placa.
ING a yega na un acuerdo cu Ministerio Publico Hulandes relaciona cu e cuestion aki. Entre 2010 y 2016 e trafico di pagamento no a wordo bon controla, pa cual criminalnan por a haci uzo di cuentanan bancario pa laba placa. Banco ta paga e suma record di 775 miyon euro.
SEC a cera e investigacion di e caso aki y a dicidi cu nan no lo tuma medida extra. Pero e caso pa ING no a caba. Accionistanan kier mas claridad como tambe minister di Finansas kier tende di e banco cual ta e medidanan cu a wordo tuma.