WASHINGTON D.C., Merca – Desde dia 4 di October te cu dia 7 di November, personanan cu ta interesa pa tin un visa pa biba permanentemente na Merca, por registra riba e pagina di Departamento di Estado.
E Programa di Visadonan di Diversificacion di Imigrante (DV-2018) lo entrega “at random” cada aña 50 mil visa permanente den un sorteo computarisa. E permisonan di residencia ta wordo entrega entre paisnan cu escaso afluencia migratorio pa Merca, segun Departamento di Estado ta indica.
Pa e “loteria di visa aki”, como tambe e conocido e programa, no por participa ciudadanonan di paisnan di e region manera Brasil, Colombia, Republica Dominicana, El Salvador, Haiti, Mexico, Peru, ni di otro paisnan manera Bangladesh, Canada, China, India, Jamaica, Nigeria, Pakistan, Filipinas, Sur Corea, Reino Uni (cu excepcion di Noord Ierland) y Vietnam.
“Ley ta defini como paisnan di alto riesgo cu den e ultimo cinco añanan tabata tin un indice di imigracion di 50 mil persona of mas pa Merca den e categorianan di visa, tanto famia como di trabao,” e Departamento di Estado a bisa.
E autoridad ta adverti cu pa wordo eligi “at random”, e programa no ta garantisa cu e persona ricibi un visa, sino cu e ta cualifica pa solicita un Visa di Diversidad.
“Solamente e prome 50 mil solicitante selecciona cu ta cualifica, ta obtene visa,” Pues ta posibel pa selecciona mas di e cantidad di participante, pero solamente lo bay duna e prome 50 mil aspirante cu presenta tur documentacion den regla, autoridadnan ta bisa.
No tin ningun costo pa inscribi den e programa aki, segun Departamento di Estado a indica.
Kico tin mester pa wordo eligi?
Departamento di Estado a indica riba nan pagina web cu esnan cu ta interesa den inscribi den e programa aki tin cu cumpli cu rekisitonan “simpel pero estricto” pa cualifica pa obtene un Green Card.
Prome, mester ta naci den un di e paisnan eligibel y di dos, cumpli cu e rekisito di educacion of experiencia laboral:
* A conclui satisfactoriamente enseñans secundario of su ekivalente, cu ta defini di a cumpli cu exito 12 aña di educacion primario y secunario.
* Tin dos aña cumpli di experiencia laboral dentro di e ultimo cinco añanan den un ocupacion, rekeriendo por lo menos dos aña of experiencia pa traha.
E base di dato di Departamento di Trabao di Merca lo wordo uza pa dewtermina si su experiencia laboral ta cualifica pa e proceso aki, e Departamenot di Estado ta splica.
Si bo a nace den algun di e paisnan no eligibel ainda bo tin oportunidad di aplica pa e loteria di visa si bo casa a nace den un di e paisnan eligibel of si bo mayornan a nace of tabata residentenan legal na momento di bo nacimento di algun di e paisnan aki.
E inscripcion lo ta habri te cu dia 7 di November di 2016 te cu 12’or di merdia. Departamento di Estado no lo otorga na ningun pais mas di 7% di e visadonan di diversificacion disponibel.
E resultadonan di esnan cu a wordo eligi lo ta disponibel riba e pagina di Departamento di estado (dvlottery.state.gov) desde dia 2 di Mei di 2017 y dia 30 di September di 2018.
Departamento di estado ta alenta na e interesadonan na inscribi “mas pronto posibel” pues e demanda excesivo na final di e periodo di inscripcion por haci cu e sistema bira slow.
Paisnan den e region cu por aplica pa e programa aki ta: Antigua and Barbuda, Argentina, Barbados, Belize, Bolivia, Chile, Costa Rica, Cuba, Dominica, Ecuador, Granada, Guatemala, Guyana, Honduras, Nicaragua, Panama, Paraguay, Saint Kitts y Nevis, Saint Lucia, St. Vincent and Grenadines, Surinam, Trinidad & Tobago, Uruguay y Venezuela.
Fuente: CNN en Español