WASHINGTON D.C. – Autoridadnan federal y local di Merca ta redoblando e medidanan di siguridad contra potencial atakenan electronico na sistemanan di votacion pa eleccionnan presidencial di diamars, pero no ta premira actonan di violencia.
E menasa di atakenan cibernetico y e posibilidad di chokenan violento ta ensombrece e ya dificil campaña entre e candidata democratico Hillary Clinton y e republicano Donald Trump, mey mey di temornan cu Rusia of algun otro actor externo ta purba di complica e votacion.
Tur e estadonan, menos dos a acepta ayudo di Departamento di Siguridad Nacional pa controla e sistema di votacion y ta lidia cu posibel vulnerabilidad, un funcionario di e cartera aki, a bisa na Reuters.
Ohio a pidi proteccion di e unidad cibernetico di e Guardia nacional, mientras cu diahuebs, autoridadnan di Arizona a reuni cu su agencianan local y FBI pa discuti posibel menasanan.
Expertonan di siguridd y autoridadnan Mericano ta bisa cu e posibilidadnan di un atake di hacker cu ta altera e eleccionnan ta remoto, den parti pasobra e mashinnan di votacin no ta conecta na internet. Pero FBI a emiti un alerta na Augustus pa e estadonan tras di detecta violacionnan den e basenan di dato di votante na Arizona y Illinois.
Funcionarionan di inteligencia no identifica a bisa NBC News cu no tin menasanan specifico riba un atake pa diamars, pero a remarca cu nan ta preocupa pa e posibilidadnan cu hackernan di Rusia of algun otro pais ta purba di complica e proceso disemina informacion falso atrabes di e manipulacion di rednan social manera Facebook of Twitter.
En tanto, e posibilidad di actonan di violencia riba e dia di eleccion a bay ta creciendo. Un cantidad sin precedente di gruponan arma den varios punto di pais a bisa cu cu lo bay controla centronan di votacion en busca di señalnan di fraude.
Fuente: NTN24