Na e momentonan aki e desempleo bao di nos hobennan ta mas cu 30%. Un di cada 3 hoben ta sin trabou y sin perspectiva. E gobierno di AVP a haci e situacion ainda mas dificil pa nos hobennan cu nombracionnan politico y faboritismo y sigui e cambio di edad di pensioen pa 65 aña a haci’e dificil pa nos hobennan por haya un trabou. Den ultimo 8 aña si bo ta un hoben, pa bin na remarca pa haya trabou bo mester por a cana cu Mike Eman of mester a haci e promesa cu bo lo bay cana cun’e eleccion cu ta na caminda. Hobennan ta demotiva, hobennan no ta haya e oportunidad cu nos mester crea pa nan. Si bo no tin un partij diploma di AVP lubida cu bo ta haya un trabou. Den e 137 coordinadornan di Mike Eman gran mayoria ningun a caba un scol secundario pero tur ta cobra salario di averahe 5000 florin pa luna. Decisionnan asina ta kibra e moral di e hoben studiante cu ta fia placa, hinca su curpa den debe pa ora e bin bek su pais no tin trabou pe pasobra e no a core campaña pa AVP.
Esaki ta e tristo realidad cu nos hobennan ta pasa aden na e momentonan aki. Ami como hoben t’ey pa nos hobennan y sigur lo traha pa yuda e siguiente generacion cu ta bin despues di nos. Ta nos tarea y obligacion pa crea oportunidadnan nobo y posibilidad pa nos hobennan por yega na un trabou cu finalmente lo conduci na un carera profesional. Nos tin cu duna nos hobennan e atencion cu nan merece. Hobennan a wordo lubida por completo. No tin trabou pa esunnan cu ta na Aruba, ora esunnan gradua den exterior y dicidi pa bin bek no tin trabou pa nan y esaki ta hopi frustrante. No solamente trabou ta un problema serio sino vivienda. E gobierno aki a privilegia un famia cu mas cu 100.000 M2 di tereno pa bende y e hoben mes no a bin na remarca pa un tereno. Na momento cu un hoben bin bek su pais e ta busca un trabou, e no ta hay’e, e ta busca un tereno, e no ta hay’e, ki perspectiva un hoben asina tin riba su mesun pais.
Tin hopi pilar economico cu por yuda crea empleo. Nos mester cuminsa pensa den direccion di e-commerce caminda mester cuminsa prepara leynan pa haci esaki mas facil pa lanta negoshinan cu kier haci e commerce. Banco Central mester ta mas flexibel den esaki. Nos no por keda atras cu tur e desaroyonan di tecnologia. Nos mester cuminsa haci uzo di e oportunidadnan cu tecnologia ta brinda nos. Stimula nos hobennan cu nos tin e capacidad pa haci cosnan grandi.
Nos mester elimina tur redtape cu tin existente ora un hoben kier lanta su propio negoshi. Mester por tin e posibilidad di banco pa reduci interes pa comerciantenan nobo y hoben. Duna nan un speransa cu na Aruba por haci negoshi facil y haya placa fia na un interes faborabel. Ta cosnan cu na e momentonan aki no tin. Otorgamento di tereno mester bay na un manera transparente y mester percura pa tur peticion di tereno di pueblo y di nos hobennan wordo acomoda. No mester bay paga of roga minister pa un tereno. Nos mester di transparencia. Tur hende mester por sa kende a pidi tereno, kende a haya tereno y pakico a haya tereno.
Nos tin cu inverti hopi mas placa den enseñansa, no solamente den cosmetica sino den contenido. Enseñansa mester bira atractivo pa nos hobennan. Deporte a wordo lubida y neglisha y aki tambe nos partido lo bay inverti den esaki.
Nos hobennan ta nos futuro di mañan y si nan wordo neglisha manera a sosode e ultimo 8 aña nan aki nos pais NO lo tin futuro. Ami ta kere den e potencial di nos hobennan, mi ta kere den un miho mañan pa nos hobennan y mi lo traha dia y anochi pa haci esaki posibel pa nos hobennan y nos hendenan tin un miho mañan!