Den oranan di marduga di diasabra, despues cu e e resultadonan di eleccion a bira conoci , Sra. Evelyne Wever – Croes, lider di Partido MEP, a duna su prome declaracionnan encuanto di e resultadonan.
Sra.Wever- Croes, lider di partido MEP a bisa di ta hopi satisfecho, ya cu MEP a bay dilanti cu dos asiento, cual ta algo hopi grandi. Nan ta e partido cu a bay mas dilanti. AVP a bay atras cu 4 asiento, aunke den cantidad di voto nan ta ariba di MEP. Cu esaki pueblo a rechasa e corupcion di tur e añanan aki.
Loke semper cu MEP tabata desea tabata pa nan por goberna nan so, pero asina mes MEP ta hopi contento cu e resultado di eleccion. Sra. Croes a felicita Sr. Ricardo Croes, di ReD, ya cu nan a logra nan prome asiento. Lamentablemente, tin algun di e partidonan chikito cu no a logra nan meta.
Tambe Sra. Wever- Croes a felicita partido POR cu a bay dilanti cu un asiento, ya cu na su opinion, nan tabata tin e asiento di PDR caba.
Lider di partido MEP, a duna un pabien na e pueblo di Aruba, ya cu un señal cla y raspa a wordo duna cu ta basta cu corupcion, ta basta di bagamunderia den gobierno. Pero mirando e resultado di eleccion, door cu partido AVP ta e partido mas grandi e ta e prome yama pa forma un gobierno di coalicion.
Segun Sra. Wever- Croes, MEP ta habri pa tur partido, cu excepcion di partido AVP. Pero door cu AVP a keda como e partido cu mas cantidad di voto, e ta e prome pa negocia un coalicion. Y no ta na MEP pa haci esaki.
Si partido MEP ta dispuesto pa haci loke mester haci pa no laga e gobierno aki mas largo na mando. Lo mester acelera e proceso y mas trempan, MEP ta dispuesto pa haci esaki. Sra. Croes a tuma e ehempel di Hulanda, caminda cu despues di eleccionnan na Maart, awo na September ainda nan no por forma un gobierno. Den partijraad di MEP, e ora hunto e partido lo tuma un decision.
Ya caba cu e pueblo a castiga AVP door di kita 4 asiento for di nan, y esey segun Sra. Evelyne Wever – Croes ta un castigo severo caba, ya cu ta un tercera parti di su sosten e partido a perde. Pero mirando e menasanan pa voto, MEP por wak bek ariba un campaña hopi limpi y nan ta hopi satisfecho cu esaki.