Ta berguensa dirigentenan di MEP mester tin ora cu nan kier hunga politica cu construccion y reconstruccion di scolnan rond Aruba.
Parlamentario Jeffrey Kelly ta mustra cu si tuma nota di e reaccion di siman pasa di fraccion di MEP riba kico gobierno di MEP a haci pa loke ta construccion di scolnan nobo, ta mescos cu nan pinta e scenario tristo y bergonsoso cu gobierno di MEP pa ocho aña a habraca practicamente scolnan rond Aruba.
MEP a neglisha enseñansa y awo kier hunga “mooi weer”
Nos por mira claramente cu fraccion di MEP no kier acepta y mira e berdad pa cual pueblo a castiga e partido na 2009, mandando e partido aki pa oposicion pa e fracaso grandi di un maneho sin pia ni cabes pa ocho aña largo.
Ora cu MEP kier papia cu su gobierno for di 2001 te cu 2009 a construi tres scol nobo, e ta mustra e mesun mentalidad politico pa cual e partido awe ta den oposicion y no den gobernacion mas. E solo hecho cu politiconan di MEP no ta compronde cu bou maneho di Gobierno di MEP, apesar di a construi tres scol nobo, e mesun gobierno geel aki a permiti alrededor di 40 scol putri bay, lagando studiante- y maestronan hayando educacion den scolnan cu tabata bin abou riba nan cabes.
For di 2009 te cu 2013 caba Gabinete Mike Eman I a inverti den no menos cu 29 scol cu tabata den decadencia serio, cu bentana- y portanan cu a putri, caminda cura di scol a putri y cay abou, lagando e muchanan den un situacion sumamente peligroso.
Pa colmo den e propio bario di MEP na Sta Cruz, dos scol a putri bay bou di nanishi di gobierno di MEP y tur hende por a ripara con e lider di MEP na reapertura di Colegio San Antonio, practicamente por a roga pa corta sinta di e scol aki cu a bira practicamente nobo.
No solamente a renoba e scol aki y otronan tur rond Aruba, pero a construi lokaalnan adicional dunando mas espacio pa acomoda mas alumno na e scolnan aki.
Esaki ta conta mesun cos cu Colegio San Jose cu bou bista di dirigentenan di partido MEP, a deteriora den su estado fisico y cu a rekeri un trabou grandi di mantencion y reconstruccion.
Inversion den enseñansa mas bisto cu nunca durante gobernacion di AVP
For di 2009 te cu 2013, Gobierno di AVP a inverti un suma di mas cu 54 miyon florin, den proyectonan caminda a atende 29 scol cu gobierno di MEP a laga decai formalmente y pa awe politiconan nobo di MEP, kier pretende cu e berdad di e maneho desastroso di un gobierno di MEP, a wordo lubida pa pueblo.
For di 2013 te cu awe, Gabinete Mike Eman II a inverti e suma grandi di casi 23 miyon pa medio di FDA y un suma adicional di algo mas cu 2 miyon pa medio di e Onderwijsfonds, ilustrando y confirmando un biaha mas, e negligencia y falta di responsabilidad total di partido MEP pa cu enseñansa y educacion di nos mucha- y hobennan.
Si miembronan di fraccion di MEP ta Parlamentarionan serio y ta cumpli cu nan deber di atende cu asuntonan di pueblo durante di reunionnan den Parlamento, loke ta nan obligacion, nan lo a ricibi e lista di prioridadnan cu Gobierno a manda pa Parlamento, caminda cu e aña aki, 12 scol ta riba e lista pa wordo atendi, entre otro Scol Primario Prinses Amalia hunto cu su gymzaal y Arco Iris cu mientras tanto a keda completa.
E prome fase di renobacion di Arubanita, Maria Regina School, Rosa College, Beatrix School cu ya a muda hunto cu Juliana School pa asina prepara pa inicio di e plan di renobacion grandi cu mester tuma luga. Pero MEP ta keda opta pa cana rond wowo tapa pa tur loke ta progreso y desaroyonan infrastructural den enseñansa. Ta mas cu bisto cu den fraccion di MEP ningun di nan no ta mustra interes pa enseñansa, cu excepcion di ora ta cumbini nan politicamente, Parlamentario Jeffrey Kelly ta mustra.