Si no bin cu e ley di ID obligatorio, polis su man ta keda mara pa haci control y pesey MEP kier bin cu e plannan aki manera cu nan drenta Gobierno, segun parlamentario Guillfred Besaril.
Tin un ley di Identificacio oblitatorio, no ta un fenomeno desconoci den nos reino. Pa esnan cu gusta Google, ta wuip2005. Den e ley Hulandes ta prescribi cu desde edad di 14 aña, bo mester cana cu un medio di identificacion legal. Sea cu e ta un Identificacion ID of ta un paspoort den caso cu ta menor di un edad of por ehempel una bes cu yega edad di 18 y haya rijbewijs, un rijbewijs cu ta valido. E ley aki ta papia tambe cu esun cu tin e derecho na controla e ley, esta pa infringi e ley, ta polis of e ambtenaar cu wordo apunta por medio di un ordenansa. Ta depende kico e ambtenaar ey ta controla. Tin control di medio ambiente, tin control riba diferente vergunning y den futuro lo bay tin control mas estricto di nos costanan. Un ley asina aki ta na su luga, pa asina aki tin control. Na e momentonan aki, a bin masha bunita, cu un ley di prohibicion di alcohol pa menornan di edad, pero con ta drenta den un localidad y controla en realidad si tin menor di edad eyden. No tin ningun manera cu un ambtenaar ni polis por yega na un ciudadano y bisa cu ta bezig cu un control riba un ley y kier mira ID. Practicamente a bin cu un ley cu tin tur bon intencion, pero e ta un ley morto pasobra e falta algo adicional pa dun’e bida.
Ta conciente di dje y pesey na momento cu MEP drenta den e proximo gobernacion, nan si ta haci loke mester wordo haci, pa leynan por wordo infringi corectamente, conforme e intencion. Por bin cu tur bon intencion, pero no haci’e na e manera corecto, e ta keda un ley morto. Pesey MEP lo bin cu e ley di identificacion, conforme loke ya Reino conoce. No ta bay para inventa wiel, no ta bay para perde tempo. E pueblo aki kier solucion y e kier solucion rapido, conciso y directo pa e problema cu tin riba caya.
Na e momentonan aki kier pa nos cayanan wordo controla, kier pa tur ley pa con bunita nan ta, no keda como leynan morto, pa e leynan biba den nos comunidad y asina aki trece bek e trankilidad tan anhela cu pueblo ta grita pe.
Parlamentario Besaril a sigui splica cu berdad tin e derecho como Parlamentario di bin padilanti cu un ley. Pero un aspecto hopi importante ora cu ta bin cu un ley, ta e comentario di Gobierno. Si bay bek riba por ehempel e ley di castigo minimo riba menor. E ley a wordo entrega pa partido MEP for di 2010 y dicon te 2017 no a wordo trata, pasobra te ainda gobierno no por duna un comentario kico e ta pensa riba e ley. Ora cu bin cu un iniciativa di ley, tin un proceso cu tin cu respeta. Gobierno tin un rol den dje, Parlamento tin su rol den dje, departamento di asuntonan huridico, Raad van Advies, tur e organonan aki tin un rol den dje.
Mester wak den Memorie van Toelichting, un splicacion di esnan cu ta bay traha cu e ley, sea ta ministerio publico, sea ta un ley bestuurlijk, tur tin cu duna un comentario. Pesey su colega di otro partido a splica cu na momento cu no tin un cooperacion di un Gobierno cu ta sordo y modo, pa motibo di un comentario, ta mira cu e iniciativa cu ta bin dilanti, ta dal pega. Pesey MEP ta bisa cu na momento cu tin un Gobierno di signatura di MEP, e leynan aki lo bin, sin basila dos biaha pasobra ta sinta scucha pueblo, ta drentando den cas di Pueblo, no awor aki pasobra tin eleccion na September, pero for di aña pasa Maart a cuminsa haci un inventarisacion pa sa unda ta para, kico ta loke e hendenan kier mira pa asina aki trece e ordo, e prosperidad y vooral e trankilidad cu nan ta gritando p’e, segun Guillfred Besaril.