Dia 26 di November partido Movimiento Electoral di Pueblo MEP a conmemora 30 aña di fayecimento di e gran estadista sr Betico Croes, den feliz memoria.
Durante di un ceremonia den Santana di Santa Cruz, a cuminsa cu un ofrenda floral.
Siguientemente presidente di Fundacion Betico Croes, sr. Maikito Croes a hiba palabra, y expresa gratitud pa a conoce un persona asina grandi manera Betico Croes. Tambe a exprtesa gratitud pa tur e soldatnan cu awe ta continua cu e lucha di Betico.
Presidente di partido MEP, dr. Gerrit Croes, a elabora riba e curashi di sr. Betico Croes, y a expresa cu danki Dios e palabra ‘cobardia’ no tabata pertenece na e vocabulario di sr. Betico Croes, y partido MEP ta sigui su ehempel.
Lider di MEP, sra. Evelyn Wever-Croes, a comparti e momentonan 30 aña pasa, ora el’a haya e noticia di fayecimento di Betico Croes, tempo e tabata biba na Hulanda y tabata comparti un apartamento cu Glenbert Croes. Ta e mester a duna Glenbert Croes e noticia. sra. Evelyn Wever-Croes a comparti cu p’e ta un orguyo di por a conoce Betico, y cu e palabranan legendario “Si mi cay na caminda, gara e bandera y sigui cu e lucha”, ta un inspiracion awe ainda. “Ban gara e bandera y continua cu e lucha cu Betico no por a caba cun’e”
Den nomber di famia a hiba palabra sr. Glenbert Croes, ken a gradici sr. Nel Oduber y sra. Evelyn Wever-Croes pa a continua cu e lucha di su tata, liderando partido MEP. sr. Glenbert Croes a bisa cu nos no mester bin na e graf di Betico pa cende un candela, pasobra e candela ta cendi caba, y tanten cu partido Movimiento Electoral di Pueblo ta existi, e candela ey lo keda cendi den nos curason.
Despues di e ofrenda floral, a sigui un Santa Sacrificio di Misa na santa Cruz, asisti pa hopi candidato, ex-candidato y famianan di Betico Croes.
MEP a duna honor na gran forma na sr. Betico Croes, dfm, un persona cu hamas nos lo lubida.