Lider di MEP Evelyn Wever-Croes ya desde algun luna ta otorgando reconocemento na baluartenan di partido MEP. Na lidernan di bario, na caciquenan di partido, na esnan cu a sostene sr. Betico Croes y sr. Nelson Oduber.
“Nos a cuminsa aña pasa Maart otorgando reconocemento na esnan cu a contribui na nos himno y nos bandera. Na November nos a duna homenahe na candidato y ex-candidatonan di nos partido. Y dia 24 di Januari di e aña aki nos a cuminsa cu e miles di baluarte. Dia 24 di Januari nos a otorga 300 reconocemento, y dia 9 di Februari, den cuadro di celebracion di 46 aña di existencia di MEP, nos a otorga 50 reconocemento mas.
Awor nos ta preparando pa un grupo grandi di reconocemento pa dia 17 y 18 di Maart proximo. Y naturalmente nos lo sigui despues tambe, te ora nos a haya tur hende pa reconoce. Ta hopi hende tabata para na fundacion di nos partido, hunto cu Betico Croes y despues cu Nelson Oduber a haci nos partido grandi. Poco poco nos ta yega na tur. Nos tin un programa pa yega na tur durante e aña 2017. Pasobra semper ta importante pa bo para keto y gradici esnan cu tabata tin e curashi, y e determinacion pa combati maldad den gobernacion. Tur hende cu a duna su aporte, sea ta den campaña, sea ta door di drenta den politica, sea ta door di yuda cose bandera y verf e emblema di MEP riba e bandera, sea a yuda cu e barco di libertad, sea cuidando Betico y Nel, of cu cualkier otro aporte, ta danki na cada un di nan nos pais awe conoce su propio gobierno, su propio parlamento, su propio Banco Central y su propio moneda. Y ta importante pa nos hobennan mira e ehempel cu nos baluartenan a duna: cu nada por strobe bo di logra bo meta. Nan a kere den e meta cu ta un Aruba cu status autonomo den Reino, y nan a mustra curashi y determinacion. Y ta pesey nos ta duna nan homenahe, y sinceramente mi mester bisa cu e homenage aki tin un significacion hopi especial pa esun cu ta ricibi’e, pero mas aun pa ami como e di tres lider di MEP, por otorga nan y gradici nan”, lider di MEP Evelyn Wever-Croes a duna di conoce.