October ta luna di Conscientisacion di Cancer na Pecho. Esaki ta un campaña mundial na unda ta duna mas importancia na conscientisa y educa hende muhe tocante deteccion na tempo di cancer na pecho.
Cancer na pecho ta e di dos tipo di cancer mas comun den hende muhe.
E bon noticia ta cu hopi hende muhe por sobrevivi cancer si esaki wordo detecta y trata na tempo.
Conocemento di e causanan di cancer na pecho actualmente no ta suficiente. Ta p’esey mes, deteccion na tempo ta e miho solucion contra e malesa aki. Ora cu cancer wordo detecta na tempo, por establece un diagnostico adecua y por cuminsa cu e tratamento na tempo. Y posibilidad pa cura di e malesa ta bira mas grandi.
Un mamogram por yuda detecta cancer na pecho ora esaki ta den su comienso y mas facil pa responde na tratamento.
Deteccion na tempo di cancer na pecho por salba bo bida. Nos ta recomenda pa bo samina bo mes tur luna. Si bo nota cualkier cambio den bo pechonan, consulta bo docter. Haci un mamogram despues cu bo cumpli 40 aña. Encurasha tur hende muhe den bo famia y amistadnan pa haci esaki tambe.
Cancer na pecho ta un malesa cu ta cambia bida di famianan rond mundo. Ta pa e motibo aki mes nos tur mester encurasha otro pa ta mas conciente di e malesa aki.