MEP: Evelyn Wever-Croes a bisa loke e ta bay haci, y a haci loke el’a bisa

Lider di MEP Evelyn Wever-Croes tin ya algun dia bou di atake principalmente pa hendenan den su propio partido. naturalmente tur hende ta mira oportunidad. Esnan cu nunca por a acepta un lider femenino den partido MEP ta mira nan oportunidad pa bruha tera.
Tur esaki debi cu Evelyn Wever-Croes a haci lo sobre humano pa cumpli cu peticion di pueblo, y a para pa su principionan. Unico cos cu e ta lamenta ta cu e no por a comunica e decision aki prome cu votacion den reunion di Parlamento. Sinembargo mesora cu el a sali di e reunion, el a bay den un programa di radio y den un entrevista cu a dura casi un ora, a duna tur informacion. Siguiente dianan el a sigui, y te awe ainda, y por bisa cu e tabata consistente cada biaha cu el a papia. P’esey el a declara riba facebook tambe: “Ami ta bisa loke mi ta haci, y mi ta haci loke mi ta bisa”.
Laga nos analisa kico sra Evelyn Wever-Croes a bisa.
Na prome luga sra. Evelyn Wever-Croes tabata e unico persona cu a vocifera desde un principio cu e lo haci lo maximo pa cumpli cu peticion di un gran parti di comunidad pa matrimonio keda un instituto entre homber y muher, y el a cumpli cun’e.
Na di dos luga sra. Wever-Croes a bisa cu MEP no ta sostene e amienda di sra. Desiree Croes, y nan a mantene asina, te cu sra. Desiree Croes a trek in su amienda, a kit’e for di mesa.
Finalmente sra. Evelyn Wever-Croes a anuncia cu e lo bin cu alternativa pa parehanan cu ta biba cu otro y no ta casa, y esey ta hustamente locual el a haci den amienda # 7.
Sin amienda # 7, e posibilidad ta keda existi pa matrimonio di persona di mesun sexo bira realidad na Aruba. Awor cu a bin cu amienda # 7 a cera e porta ey.
Mes momento a duna derecho na esnan cu no tin derecho actualmente, pasobra veredicto di Corte di Derecho Humano a stipula cu mester hasi esey. Amienda # 7 ta cumpli cu e exigencianan minimo di Tratado di derecho Humano, pa mantene matrimonio entre homber y muher.
Conclusion: sra Evelyn Wever-Croes a haci exactamente locual el a bin ta bisando constantemente.

Comments

comments