Lider di Oposicion, Evelyn Wever-Croes, a reacciona riba e resultado di eleccion Hulandes. “Nos ta felicita e partidonan cu a gana y nos ta desea nan hopi exito. Nos ta spera cu e ciudadano Hulandes haya e Gobierno cu e ta desea.
Pa nos na Aruba e no ta haci mucho diferente cua partidonan ta forma e coalicion. Esaki ta e escogencia primario di e ciudadano Hulandes. Pa MEP ta di importancia pa accentua riba e relacion di Aruba-Hulanda, bira mas madura. Nos ta kere den un bon relacion den Reino, pero cu un base aduro y di respet mutuo.”
Madures
Cu madures Wever-Croes kiermen cu Aruba vooral tin cu soluciona su propio problemanan y no pa cualkier wisji washi bati na porta di Gobierno Hulandes. Esey ta loke nos no a mira den e ultimo añanan. E actual minister presidente di Aruba ta basha e porta di Hulanda den otro.
Y hasta esey no a yuda pa evita un KB debi na mal maneho financiero (2014).
Tambe e yoramento di prome minister Eman (AVP) riba television internacional durante su welga di homber, su prueba cu e relacion actual ta leu di ta un relacion madura. Hasta den un relacion madura e insinuacionnan di Prome Minister Mike Eman, cu tur Hulandes ta abusador, no ta na su luga. Tambe un boycott for di su luga y hasta infantil di Prome Minister Eman contra gobernador Boekhoudt, ta mustra cu mester bin un cambio den e relacion.
Respet Mutuo
“Mi kier tambe mira cu e paisnan trata otro cu respet mutuo. Mi ta kere den dje. E Gobierno Arubano nobo cu lo sinta despues di eleccion di September 2017, cual ta spera cu MEP ta forma parti di dje, tin hopi trabao pa bay haci pa asina gana bek e respet ey. Pasobra e tratamento sin respet cu nos a mira durante e ultimo 7 añanan aki, mester cambia.
Nos ta para pa e cambionan aki. Un relacion madura cu Hulanda lo hiba Hulanda pa mas comprension y ta spera pa un miho relacion den Reino,” segun lider di MEP, Evelyn Wever-Croes.