MEP: E gobierno nobo mester ta serio y fuerte pa negocia con ta bay paga e debe bek

“Desde cu e pandemia mundial Covid-19 a bati na nos porta, Aruba a hay’e den un situacion financiero hopi dificil. Prome cu e pandemia Gabinete Wever-Croes a pone Aruba bek riba e caminda di finansas sostenible y hasta tabata vislumbra un surplus pa aña 2020, prome cu e pandemia. A yega na palabracionnan cu Hulanda, despues cu e gobierno anterior a kibra tur palabracion. Y e confiansa di Hulanda den Aruba a wordo re estableci. Lamentablemente despues e pandemia di Covid-19 a cera porta pa Aruba riba mercado financiero internacional, y Aruba a hay’e forsa di bay presta placa di Hulanda,” esaki ta loke partido MEP, partido mas grandi di e actual coalicion, ta bisa den un declaracion.

Nan ta bisa cu desde un principio a palabra cu parti di e debe por wordo dispensa, den forma di schenking. Pero Hulanda a indica cu esey lo wordo discuti na 2022, ora mester cuminsa paga e debe bek.

Esaki kiermen cu e siguiente gobierno mester ta uno serio y fuerte pa negocia cu Hulanda pa dispensacion di parti di e debe of e debe completo. Aki no tin espacio pa gobernantenan zwak cu ta bay den welga di hamber. Ni tampoco tin espacio pa aventura. Y sigur no tin espacio pa gobernantenan cu kier bay den pleito cu Hulanda pasobra ta hopi ta depende di e negociacionnan aki. Sobrevivencia di nos pais ta depende di e negociacionnan aki.

Aruba mester awor mas cu nunca gobernantenan cu a demostra cu por enfrenta retonan y presion grandi. Gobernantenan cu experiencia y cu vision. Aruba awor mas cu nunca mester di Partido MEP den gobierno. Prome Minister Evelyn Wever-Croes a demostra curashi. El a demostra seriedad. E ta inspira confiansa localmente y internacionalmente. Tanto simpatisante y opositornan ta di acuerdo cu e ta e unico persona cu awor por lidera y saca Aruba for di e pandemia. Aruba, dun’e bo confiansa!

Comments

comments