Den cuadro di celebracion di 45 aña di MEP henter e aña aki nos a organisa actividadnan pa henter nos pueblo na nos Sede, cuminsando cu e Expo y Homenahe dia 18 Maart, despues na April y na October tambe. Tur a wordo hopi bon bishita. A toca turno recientemente na nos ex candidato y candidatonan cu a figura riba lista di MEP den un actividad sensiyo pero hopi bunita na Fort Zoutman. Un total di 60 persona a wordo homenahea y presenta cu un bunita revista cu e historia di 45 aña MEP.
Esnan cu a hiba palabra tabata dr Gerrit Croes presidente di partido MEP, sr Chenco Yarzagaray, sr Nel Oduber y lider di MEP Evelyn Wever-Croes. Historia presente y futuro di partido a wordo presenta.
A presenta un video HISTORIA DI MEP TA HISTORIA DI ARUBA, cu a causa un impacto grandi riba tur esnan presente.
Tabata tin un alegria grandi y un Orguyo di e historia di partido. Por a sinti e Union y solidarismo entre e candidato, ex candidato y nan famia, pa enfrenta e futuro.
Un danki ta bay na tur cu a haci nos celebracion di 45 aña MEP un exito y keda pendiente pa ciere di e aña di celebracion na December. MEP ta un partido firme y solido, y preparando pa campaña 2017.
E Plan di campaña ta cla. E Programa di campaña ta cla. Materialnan di campaña ta na caminda. Nos solucionnan, nos politiconan experiencia combina cu e cambionan necesario riba e lista di candidato, lo ta e formula exitoso cu lo demostra cu MEP lo ta e UNICO alternativa den e siguiente eleccion.