Comunidad Arubano a ser grandemente sacudi ora cu a tuma nota con cierto pirata, sponsor y compinchinan politico liga directamente na partido AVP a wordo recompensa cu un gran cantidad di terenonan di gobierno y esaki cu bendicion total di e Minister di Infrastructura Benny Sevinger y Prome Minister Mike Eman. Den tur skina di Aruba e acto repudiabel di ladronicia aki a ser condena ya cu ta increibel con por ehempel un solo persona, esta Leoncita a haya den total 90.000 m2 di tereno di pueblo (ekivalente na 14 veld di futbol) p’asina e por haci negoshi pirata cu e terenonan aki bendiendo esakinan na prijsnan miyonario. Tambe no mester lubida con te hasta ministro Otmar Oduber y parlamentario Melvin Tromp a beneficia na grandi cu terenonan otorga na nan na Tamarijn y Palm Beach.
Hustificacion di pirateria
Hamas nos pueblo a yega di experencia un ladronicia di tereno di pueblo di e forma bergonsoso aki, caminda mayoria di e terenonan a wordo otorga riba e mesun dia cu e peticion a drenta na despacho di Minister Benny Sevinger. “Dezerzijds akkoord, gaarne medewerking” a bira e frase popular cu e minister aki ta aplica pa duna permiso wowo cera na su compinchinan pirata di partido y tambe na su socio Roberto Rincon cu a haya aprobacion pa tereno den apenas 3 dia di trabao. Sin ningun tiki di berguensa Minister Benny Sevinger kier ainda hustifica e pirateria aki bisando cu su “dezerzijds akkoord” y su firma no tabata tin ningun implicacion y influencia riba e otorgamento di e terenonan aki. Benny, a otro perro con ese hueso!
Un partido sin consenshi
Ta increibel con e minister di Infrastructura a otorga miles y miles di tereno di gobierno pa su compinchinan politico haci negoshi cu esakinan, mientras cu tin 11000 conciudadano tin aña y decadanan largo ta inscribi na DIP pa por yega na remarke pa un pida tereno di sikiera 400 m2. Varios di e peticionarionan aki ya a muri bay sin cu nunca nan a bin na remarke pa un pida tereno pa nan por a traha nan propio cas. Alabes tin mas cu 3000 peticion na FCCA di ciudadanonan cu kier bin na remarke pa un cas social, pero te ainda nan no a logra haya esaki ya cu e Gobierno di AVP durante 7 aña no a construi ni un solo social na Aruba. Awe den tur bario di Aruba por mira chosanan ta lantando di ciudadanonan kendenan ta wordo depriva di por biba decentemente den un cas social. Den tur e miseria cu pueblo ta pasando aden y cu nan no por haya ningun tereno di gobierno den erfpacht pa construi nan propio cas y ni nan por haya un cas social pa biba y cria nan famia honradamente, e “cristian democratanan” di AVP a demostra cu nan no tin ningun consenshi pa yuda e pueblo abandona aki, pero ta prefera di cera dealnan coruptivo cu nan compinchinan politico y ta laga nan den tur libertad pa bende terenonan di gobierno y p’asina nan tambe haya parti di e bolo.
MEP ta marca e diferencia
Den pasado gobiernonan di MEP semper a duna tur ciudadano e oportunidad pa yega na remarke pa un tereno den erfpacht y tambe a institui e fundacion social FCCA pa yuda nos ciudadanonan traha nan propio cas. Tambe nos partido a percura pa construi practicamente tur e casnan social existente na Aruba. Pues bao di gobernacion social democrata di MEP terenonan di gobierno tabata wordo destina pa gran parti pa construi casnan social pa e pueblo trahado, pa construi facilidadnan deportivo, wardanan di polis, scolnan, casnan di anciano y edificionan di gobierno.
Awe cu e reunion di Parlamento ta tuma lugar relaciona cu e maneho di otorgamento di terenonan di gobierno, ta na su lugar pa Minister Benny Sevinger y Minister President Mike Eman splica pueblo e motibo pakico nan gobierno cu semper tin nan boca yen di ta traha na felicidad di pueblo, no ta percura pa e ciudadanonan humilde bin na remarke pa un tereno erfpacht, pero cu esakinan tur ta bay den man di compinchinan politico kendenan ta haci negoshi di pirata cu e terenonan aki. Palabra ta na Gobierno awe!