Desde oranan trempan di merdia ya un fila largo a cuminsa forma y despues den un sede completamente yen e campaña anual pa yenamento di formulario di belasting a cuminsa.
Lider di MEP Evelyn Wever-Croes tabata visiblemente satisfecho. “Awe nos a yuda mas di 100 persona cu nan formulario. E aceptacion pa nos campaña tabata mas grandi cu otro añanan y e asistencia a kibra tur record. Danki na e ekipo di boluntario nos por a atende tur hende den tempo record. Bo ta ripara cu e necesidad pa tipo di asistencianan asina ta grandi den nos comunidad” segun Evelyn Wever-Croes.
Por a nota tambe cu hopi persona a acudi pasobra nan kier a saluda y combersa cu Lider di MEP. Pa demostra nan apoyo, sosten y cariño pa e sacrifcionan cu ta wordo hinca den un campaña asina. Esnan cu a wordo yuda a sali hopi satisfecho y agradecido.
E campaña ta continua diaranson di 6.00 pm pa 8.00 pm na sede di MEP.