MEP: Criminalidad a causa un otro dia scur pa Aruba

Aruba a conoce ayera varios caso cruel di atraco y asesinato. Prome tabata un caso di un señora cu a wordo agredi na un bancomatico, y manda for di tino y a wordo atraca.
Despues tabata un atraco den cas di famia, y nan a tira riba hende cu consecuencia fatal
Esey no ta e Aruba cu nos conoce. Esaki no ta e Aruba cu Gobierno di Mike Eman a priminti nos di biba aden.
Situacion di criminalidfad ta alamrante, nos ta sinti insiguridad den nos pais di dia y di anochi. Bo ta sinti bo insigur den bo cas y pafo di bo cas. Bo no sa mas kico bo mester haci pa proteha bo famia y pertenencianan.
Lamentablemente di parti di Gobierno tampoco bo ta scucha un solucion, un vision, un plan. Nos ta den crisis aworaki, y ningun gobernante ta sali y bin bisa kico mester haci den e crisis aki.

PLAN DI MEP
MEP na mas di un ocasion a presenta e plan pa salba Aruba di tanto criminalidad..
E prome paso ta cera bo fronteranan, y controla nan severamente. Pa asina evita importacion ilegal di persona, droga y arma. Radarnan mester traha bek, Warda nos Costa mester wordo re-institui, Boto di Polis mester ta mas activo y Aruba mester haya su propio helicopter.
E di dos paso ta actua cu man firme pa combati criminalidad. Pone mas agente policial riba caya. Duna Cuerpo Policial material y ekipo pa nan traha. Y e helicpoter lo yuda pa busca atracadornan mesora.
Loke falta den nos pais ta vision con pa soluciona e problemanan di criminalidad, determinacion pa soluciona nan, y curashi pa hala tur esnan cu no coopera, for di caminda.
Lamentablemente Gabinete Mike Eman a faya den tur esakinan. P’esey partido MEP ta preparando un plan di accion, y tambe ta purbando di haya un reunion den Parlamento cu urgencia cu minister Dowers. Den curso di dia nos lo duna mas informacion ki pasonan nos lo tuma.
Gobierno a faya, Minister Dowers a faya, solucionnan ta riba mesa, pero Gobierno no kier haci caso di nan.
Awe Aruba ta di luto, awe Aruba a bolbe perde un cuidadano na man di criminalidad. Cuanto mas nos tin pensa di warda. Nos ta bisa TA BASTA!

Comments

comments