Parlamento diahuebs a ricibi bishita di sudiantenan di IPA klas 3 den cuadro di “participatory governance” y lider di MEP Evelyn Wever-Croes y colega Guillfred Besaril a comparti e vision di MEP pa mehora nos enseñansa.
“Nos a duna informacion general y riba e tereno di enseñansa nos a reitera nos compromiso pa duna docentenan mas voz den decisionnan importante riba e tereno di enseñansa y pa duna nan participacion real. Pasobra ta docentenan sa kico ta biba den e veld y no tin miho cu nan pa trece e preocupacion y solucion padilanti.
Nos a splica tambe cu una bes cu MEP ta den gobierno nos lo enfoca riba tres area den enseñansa.
E calidad di enseñansa y digitalisacion di enseñansa mester haya mas atencion pa nos garantisa cu nos studiantenan por continua estudionan den exterior sin problema y pa garantisa cu esnan cu bay traha despues di caba scol, por haya trabou sin problema.
Di dos area ta e infrastructura di e scolnan. Nos a haci un inventarisacion caba di estado di tur scol na Aruba y nos tin un dossier traha pa na momento cu MEP drenta den Gobierno por pone atencion caminda mester cu prioridad. Nos no mester perde tempo e ora mas pa hasi e estudionan, nos tin nan cla caba.
Y di tres area ta cu mester amplia e ayudo y sosten na docentenan pa asina e docente por encarga su mes mas na duna les y sinti su mes bon haciendo esey.
Esaki ta nos compromiso pa mehora enseñansa na Aruba” lider di MEP Evelyn Wever-Croes a duna di conoce.