MEP: Amienda # 7 ta cumpli cu peticion di pueblo di Aruba

Parlamento a aproba un amienda # 7 den Parlamento diahuebs ultimo. Un hecho historico cu e 3 lidernan di fraccion y e presidente di parlamento a presenta. E amienda aki no ta esun di sra Desiree Croes. Desiree Croes a entrega amienda # 1 y # 2 y despues e mes a retira e amiendanan ey.pasobra e no tin sosten pa nan. Na e momento ey, e lidernan di fraccion di PDR, MEP y AVP a cuminsa reuni y negocia pa asina presenta e amienda den cual ta introduci derechonan igual pa un grupo cu na e momentonan aki no tin proteccion, y mes momento ta percura cu matrimonio ta keda e instituto entre hende homber y hende muher.

MATRIMONIO NO TA POSIBEL PA PAREHA DI E MESUN SEXO
Desde cu Corte Europeo dia 1 di Juni 2015 a dicta cu e derecho di parehanan pa biba hunto, ta wordo considera derecho humano di “family life”, esaki a trece cun’e cu Gobierno di Aruba tambe mester a tuma accion pa evita cu un hues ta bay stipula kico gobierno mester haci. Sinembargo Gobierno no a mustra ningun interes pa atende cu e tema aki.
Corte Europeo tabata hopi cla den esaki y a bisa cu no por impone riba paisnan afilia na Tratado di Derecho Humano cu nan mester reconoce matrimonio entre personanan di mesun sexo. Pero si e Corte ta impone riba e paisnan pa crea un otro instituto pa duna proteccion y derecho na “family life” y Aruba ta afilia na e tratado aki. Un pais cu no crea un instituto asina, ta atua den violacion cu e tratado internacional, y por wordo obliga pa un hues pa ancra e matrimonio di esnan di mesun sexo den ley.
Lider di MEP, Evelyn Wever-Croes a bisa desde un principio cu a base di peticion di un gran parti di nos pueblo cu ta lanta bou di e principionan Cristian, nos mester mantene e matrimonio entre homber y muher. Sabiendo di e riesgo cu e Corte Europeo a crea, Lider di MEP a drenta dialogo cu demas lidernan di fraccion pa bin cu e amienda aki, pa asina cumpliendo cu tur exigencia di Corte Europeo, pa mantene e matrimonio entre homber y muher. “Talbes tabata mas facil pa laga un hues dicidi, en bes cu nos a tuma e responsabilidad. Talbes e ora lo mi tabata mas popular, pero e lo tabata tambe e decision mas cobarde cu mi lo a tuma den mi bida di keda sin haci algo, cu mi sa cu mester wordo haci”.

DERECHO IGUAL
Mes momento a crea e instituto di union civil den amienda # 7, cu ta un instituto separa di matrimonio. E instituto aki ta duna derecho y proteccion na parehanan cu ta biba hunto y no ta casa. Den nos comunidad tin hopi hende cu kier regla nan relacion, cu kier cuida otro, pero tin otronan ta keda desampara. E amienda # 7 aki ta duna e proteccion necesario pa ningun hende keda desampara. “Esaki ta conforme e principionan di nos partido social democrata, e ser humano central, sin distinccion di rasa, religion, afiliacion politico ni tampoco sexo. Nos partido MEP a wordo funda a base di e principionan aki, y pesey mi ta orguyoso cu cumpliendo cu nos ideologia, nos a trese e drecho y proteccion aki pa esnan cu no tabata tin e proteccion.”

Comments

comments