JIANHU, China – Despues di e homicidio, e adolescente a keda scondi pa mas di un dia den un restaurant cu ta keda 24 ora habri, unda cu el a wordo aresta finalmente.
Na China, un adolescente di 13 aña a mata su mama cu’n cuchiu pa vengansa despues di cu e muhe a caba cu e bida di e cacho di e menor den su presencia. E echonan aki a tuma luga diasabra ultimo den oranan di anochi den cas di e famia, situa den e condado di Jianhu, segun informenan di South China Morning Post.
Despues di e sucedido, e asesino, identifica como Shao Fuming, a busca refugio den un restaurante cu ta keda habri 24 ora, unda cu’n oficial di polis a hay’e dialuna mainta, despues cu el a pasa mas di un dia eyden.
E mama, identifica como Yang Yan, a mata e can den un intento di disciplina su yiu, medionan Chines ta informa. “Shao no tabata contento cu e metodonan disciplinario di Yang y tabata tin un conflicto grandi entre e dos partinan cu a caba den e asesinato di Yang”, polis local a informa, despues di e detencion di Shao, según fuentenan cita pa Daily Mail.
Según leynan di China, menornan di 14 aña no por wordo considera penalmente responsabel. Esunnan cu tin entre 14 y 16 aña si por wordo aresta y acusa pa delitonan manera asesinato, robo y violacion.
Un caso similar a tuma luga na december ultimo, ora cu’n mucha di 12 aña a hinca su mama mas di binti biaha cu’n cuchiu despues di cu e mama a suta e mucha pasobra esaki ta huma. E incidente a sorprende hopi hende den e pais y a provoca un protesta similar despues di cu e adolescente , di fam Wu, a wordo laga den libertad sin cu e por a wordo procesa.
Corte di husticia di Beijing anteriormente a revela cu entre tur e casonan cu ta involucra e menornan di entre 2010 y 2017, casi 15% ta delitonan cometi pa adolescentenan di menos di 16 aña.