Despues di a labora 39 aña den enseñansa na Aruba, e hopi stima sr. Herbert Goedgedrag, cariñosamente yama mr. Ebby, a bay disfruta di su pensioen.
Ultimo 5 aña, e tawata e director di Filomena College MAVO na San Nicolas y tawata cu hopi cariño y respet cu su colega nan a tuma e siman aki, despedida di su persona. Den un ceremonia cortico pero cu cariño, un grupo chikito di colega a haya e oportunidad pa desea Mr. Ebby, tur sorto di exito den e etapa nobo di su bida. Tambe ex-colega nan a presenta mensahenan virtual cu bon deseo pa meneer Ebby.
Den su speech final, meneer Ebby a desea su sucesor nobo sra. Raquel Lampe, hopi exito cu e trabao cu por ta dificil, pero bunita alabes. Cada maestro el a conseha pa sigui haci e bunita trabao aki, semper cu e sentimento di alegria ora nan educa y ta rondona pa e ser humano hoben.
Directorado di Filomena MAVO consistiendo di directora Raquel Lampe y directora adhunto Jouraine Duzong-Oduber, a haci entrega di un bunita recuerdo na nomber di e team completo di scol.
Nos tin cu remarca cu bou di directorado di meneer Ebby, Filomena College su porcentahe di graduacion, ultimo aña nan tawata hopi di respeta. Pabien meneer Ebby y disfruta di e pensioen bon mereci!