“Mi ta lamenta e retiro di sr Otmar Oduber kende ta mi amigo di hopi aña.” Esey ta palabranan di sr. Melvin Tromp, kende a splica mas di e decision malo cu e ex minister a tuma, pero cu mester wordo respeta. Tromp tabata un di e personanan cu a keda motiv’e, papia cun’e pa evita cu el a bay dje leu pa e por a tuma e decision aki. No ta un secreto y den partido tambe esaki ta bon conoci cu entre Tromp y sr. Oduber tin un amistad di amigo pa basta aña. Tempo cu Oduber a yega prome biaha na cas di partido, Tromp tabata hopi liga cu defunto Watty Vos y ta for di e tempo ey nan a cera conoci cu otro te cu sr. Oduber a desaroya su mes riba e mundo di politica cu a conduci tambe cu awe ta un di e personanan cu a sa di eheerce un trabao sublime pa loke ta regarda su cartera y den e caso aki no por exclui esaki.
No ta exclui y no tin secreto den e caso aki pasobra tur hende di partido cu conoce Tromp y conoce Oduber, sa kico ta e relacionnan amistoso cu tin y tambe colegial cu for di 2005 cu Tromp a bay den fila di AVP, e amistad a sa di crece mas.
Den bida, bo mester por sa na analisa y reconoce kico bo tin como famia, kico bo tin como amigo y kico bo tin den esnan cu bo ta kere den nan y den e caso aki tin cu bisa cu Oduber, despues di a tuma su decision, Tromp a dirigi su mes na dje y a bis’e cu e kier pa e sa cu no obstante e decision cu e por a tuma, esaki lo no bay exclui y tampoco termina e relacion entre nan como bon amigo di otro.
Esaki tabata den un mensahe di texto y a haci’e pa mustra cu amigo mester ta leal na otro den tur sentido.
A base di esaki mes, segun Tromp, mesora sr. Oduber cu su pensamentonan caba ya kico e kier haci y sigui haci y tur hende por a tende den su presentacion na momento cu el a anuncia cu e lo bay retira di e partido. El a bisa cu politica pe no a caba. Logico hende tin e tendencia, e don cu nan ta haya for di nos tata creador pa wak kico tin den cierto hende y den e caso aki Oduber a busca manera pa habri un porta pa wak kico ta e posibilidadnan cu e lo por tin e confiansa cu Tromp lo por liga su mes, uni su mes den locual cu e tin pensa pa haci, Tromp a splica.