Diahuebs dia 5 di juni y Diabierna dia 12 juni ultimo, Departamento di Aduana tabata tin un celebracion ameno meimei di coleganan pa’sina despedi di 3 colega cu ta baha cu pension. Señores Sixto Vrolijk, Haime Feliciana y Frank Dijkhoff a baha cu pension.
Hunto cu famia y coleganan a despedi di nan oficialmente. Directeur y Chefnan di Departamento di Aduana a hiba palabranan di gradicimento pa nan añanan di servicio duna na Pais Aruba mediante e organisacion di Departamento di Aduana. Pa e famia di e pensionado tanto e Directeur y e Chefnan a gradicinan pa nan e sosten duna y tempo cu nan a labora pa nan Pais. Coleganan a duna cada un di nan un regalito pa nan keda recorda e añanan cu nan a dedica pa sirbi e organisacion y Pais Aruba.
Señor Sixto Vrolijk a cuminsa labora na Departamento di Aduana dia 1 di November 1976 como hulpkommies der belastingen, durante añanan Sixto a crece y eherce diferente funcion. Sixto durante su trayectoria na Departamento di Aduana ela traha tanto na e seccion di Aeropuerto y na Waf. Tambe Sixto a traha 19 aña como speurhondengeleider, su delaster funcion cu ela eherce tabata e seccion “Stad” como Vrijmakings ambtenaar. Sixto ta baha cu pension despues di 44 aña di servicio na Departamento di Aduana.
Señor Haime Feliciana a cuminsa na Departamento di Aduana dia 1 di juni 1977 como Schrijver, durante añanan Haime a crece y a eherce diferente funcion manera Chef Algemene Zaken. Haime a wordo promovi y a fungi como Staffunctionaris Personeel en Organisatie. Haime ta baha cu pension despues di 43 aña di servicio na Departamento di Aduana.
Señor Frank Dijkhoff a cuminsa na Departamento di Aduana dia 1 di februari 1984 como Arbeider, durante añanan Frank a crece y a eherce e funcion di Bode. Frank ta baha cu pension despues di 36 aña di servicio na Departamento di Aduana.
Cada uno di nan tabata un persona importante cu conocimento amplio riba diferente tereno den nos organisacion. Nan a sirbi nos organisacion cu alma, cuerpo, curason y tin un experticio amplio riba diferente area. Coleganan di Departamento di Aduana sigur lo haya nan falta. Pero pa awo nan lo bai disfruta di nan pension bon mereci.
E portanan di Departamento di Aduana Aruba lo ta semper habri pa tuma conseho di e coleganan aki pa cu nan conosemento.