Kralendijk Boneiro: Famianan di víktimanan di violensia na Hulanda Karibense den futuro por hasi un apelashon pa un kompensashon na e fondo di daño i perhuisio di aktonan deliktivo violento (Schadefonds Geweldsmisdrijven).
Esaki minister Van der Steur di Siguridat di Hustisia a bisa awe durante di un bishita di trabou na Boneiru. “ ku esaki a tuma un paso importante pa na Hulanda Karibense mehorá e posishon di víktimanan” e minister ta haña.
Van der Steur lo adaptá e lei pa asina krea e posibilidat pa amplia esaki i ta spera ku e lei lo drenta na vigor den transkurso di 2018.
A lanta e Schadefonds Geweldsmisdrijven pa yuda víktimanan (i nan famianan) di aktonan deliktivo violento finansieramente ku a sufri leshonnan grave físiko òf sikológiko.
E akusado semper ta keda esun promé responsabel pa kompensashon pa daño i perhuisio pero si e víktima no ta logra pa haña kompensashon serka e akusado, e ora ei e víktima òf famia por hasi un petishon na e fondo. Te ku awor e areglo aki tabata bálido pa Hulanda so.
E siman aki Van der Steur ta di bishita na e parti Karibense di Reino pa papia ku koleganan di hustisia durante di e Reunion di Hustisia di kuater partido (Justitieel Vierpartijenoverleg) ku ta entre Hulanda, Kòrsou, Aruba i Sint Maarten. Na Kòrsou ela sera konosí tambe ku sr. Martina, minister di hustisia nobo di Kòrsou i sr. Boasman, minister di hustisia nobo pa Sint Maarten.
Na Boneiru Van der Steur a instalá e hefe nobo di Korps Politie Caribisch Nederland. Entrante promé di yanuari 2017 sr. Jose Rosales, ta e hefe nobo di e kuerpo na Hulanda Karibense.