Awe Banco Central di Aruba (BCA) ta publica “State of the Economy” pa e prome trimester di 2018. E publicacion aki ta duna un sinopsis di e desaroyonan economico local y internacional di e periodo aki. E puntonan mas importante ta presenta abou, incluyendo un resumen di e indicadornan economico principal.
Indicadornan di consumo tabata mixto den e prome trimester di 2018. Entradanan di impuesto a crece significante, relata na mas entrada di benta di negoshi (BBO) y impuesto riba importacion. Tin cu nota cu parti di e crecemento a resulta door di mehoracion den cumplimento y mihor inspecionnan riba importacion. Di otro banda, credito bancario na consumidornan ta mustra un bahada den consumo, cu caida den tur e componentenan di credito, pero primordialmente den prestamo personal. Sentimentonan di consumidor a mehora un poco den e prome trimester di 2018 compara cu e trimester anterior, pero consumidornan a keda pesimista.
Finansas publico a mehora un poco, ilustra pa un caida den e deficit financiero y un tasa di debestabiel. E deficit mas chikito a resulta for di un crecemento den entrada di gobierno, pa un gran parti atribui na esfuersonan pa mehora cumplimento y cobransa di retrasonan, cu a surpasa e crecemento den gastonan. Debe di gobierno a subi cu Afl. 8,7 miyon den e prome tres luna di 2018. Consecuentemente, e proporcion di debe cu PDB a alcansa na 85,8 porciento na final di e periodo. Apesar di e mehoracion marginal den e posicion financiero di gobierno, gobierno mester traha riba un fortificacion di e fundeshi.
Finalmente, e nivel di reserva di divisa neto a mehora cu 3,3 porciento durante e prome trimester di 2018, permaneciendo riba e normanan critico monitoria pa e Comision di Maneho Monetario (CMM) di BCA.
Tabel: Indicadornan economico principal pa e prome trimester di 2018 | |||
Indicador | 2017T1 | 2018T1 | Cambio |
Entrada hotelero pa camber disponibel (US$) | 301 | 333 | 32 |
Cantidad di turista (number) | 263.565 | 274.955 | 11.390 |
Bishitante di crucero (number) | 280.923 | 308.838 | 27.915 |
Permiso di construccion (Afl. miyon) | 102,3 | 95,8 | −6,2 |
Entrada di benta di negoshi (BBO) (Afl. miyon) | 25,6 | 29,9 | 4,3 |
Impuesto riba entrada y ganashi (Afl. miyon) | 76,9 | 84,5 | 7,6 |
Tasa di inflacion, promedio anual (porcentahe) | −0,7 | 0,0 | 0,7 |
Indice di confiansa di consumidor (di prome trimester, punto di indice) | 96,0 | 95,4 | −0,6 |
Fuentenan: BCA, AHATA, ATA, CBS. |
E publicacion completo ta disponibel riba BCA su website (www.cbaruba.org).