For di algun decada atras ya tabata tin e idea pa haci un mehoracion den e manera con cuido di salud mental ta organisa na Aruba. Diferente organisacion tabata sinti cu tin e necesidad pa reenforsa e cuido di salud mental door di organisa esaki bou un solo dak y asina eleva e calidad di salud mental na Aruba.
Pues siguiendo e meta aki, AZV conhuntamente cu e Minister di Salud Publico, drs. Alex Schwengle a reuni recientemente cu dos experto di Hulanda. Ta trata di señor drs. Remmers Veldhuizen y señor drs. Becker Awad (MHA; MBA-H) cu a bishita Aruba pa cuminsa e trayecto di inventarisacion di e rekisitonan clave pa organisa algun departamento di cuido di salud mental di Aruba bou di un solo dak. Na prome instante lo cuminsa trece e psikiatranan, SPD y PAAZ bou di un organisacion nobo.
Fin di September ta spera di haci un evaluacion di e documento (concepto) ricibi for di man di e dos expertonan. Den e documento aki, esta e ‘projectdossier’, lo mester tin describi tur e pasonan cu Aruba mester tuma pa logra organisa e cuido di salud mental incluyendo e suma pa realisa e meta aki.