Awe DIMAS a tene un rueda di prensa tocante cambio di maneho di admision relaciona cu efectonan di crisis di Covid19, cual manera nos tur sa, esaki a trece hopi reto pa pais Aruba; entre otro un crisis social economico. Pa algun tempo, un comision den cadena di stranheria, consistiendo di Ministerio di Husticia y Labor, a bini hunto pa asina traha riba recomendacionnan den cuadro di cuida orden publico, salbaguardia e bienestar general, proteccion di nos economia y di nos mercado laboral.
Conseho di Minister y tambe Staten a ricibi un presentacion di e recomendacionnan, y finalmente a tuma e decision, respecto un maneho di admision mas restringi relaciona cu e crisis di Covid19. Pa por a yega na e recomendacionnan aki, mester a defini tambe cua ta e grupo di enfoke: ken ta e personanan cu ta bay tin preferencia den mercado laboral pa loke ta trata e cuponan di trabao disponibel. Esakinan lo ta tur persona cu por ser considera como Arubiano, tur cu ta considera como Arubiano nobo, dus personanan cu a naturalisa y ricibi nacionalidad Hulandes, personanan cu tin admision segun ley; por ehempel door di e tipo di trabao cu ta eherce, e nacionalidad cu nan tin, of nan estado civil. Personanan cu tin un firma liber tambe, tur Hulandes den general, y Arubiano cu kier regresa Aruba bek pa contribui na economia di e isla.
Cambionan den maneho di admision
E cambionan aki a wordo introduci como medida temporal relaciona cu e situacion di e mercado laboral ocasiona door di Covid19. Ta bay introduci un stop riba prome peticion di permiso pa trahadonan. Te cu proximo aviso, e prome peticion di permiso no lo wordo otorga, cu excepcion di esnan cu ta cay bao categoria di exoneracion, por ehempel emigrantenan di conocemento, manera DIMAS ta splica. Hendenan cu ta wordo defini como ‘key positions’ den sectornan defini, inversionistanan, y esnan cu lo traha den sectornan prometedornan tambe ta un excepcion.
Por scucha mas informacion den e video abao di e conferencia di prensa di DIMAS diaranson mainta, y Masnoticia lo comparti mas informacion den proximo publicacionnan.