Siman pasa e statuut di Sindicato Alvast, cu ta representa e managernan di Elmar, a keda cla pa asina sigui megosha cu NV Elmar, segun mediador di Gobierno, Anselmo Pontilius.
Mediador a ricibi un copia di e statutonan cu nan a atende cun’e cu notario. Mediador indirectamente a informa gerencia di Elmar caba riba e hecho cu kier pa e partidonan bin mesa. No tin cu lubida cu nan tabata na mesa caba den varios punto, entre otro den e parti di reorganisacion, pero awor aki un punto importante ta pa e negociacion di e contrato colectivo. E sindicato oficialmente ta cla cu su documento. E dunado di trabao den cierto forma ya a reconoce e sindicato door di sinta na mesa y loke kier recomenda nan awor aki pa establece un periodo determina pa nan cuminsa negosha e contracto colectivo. Den pasado caba nan a intercambia di proposicion. Mediador mes tabata cu nan na mesa. Pero esaki awor aki mester por hiba nan na un prome contracto colectivo cu ta conta specificamente cu ta aplica pa e miembronan di staf, segun Anselmo Pontilius.
E ta sigui splica cu si nan a keda cla mes cu un acuerdo, e sindicato no lo tabata den un posicion legal, pa firma un contracto colectivo. E sindicato mester posee e statutonan realmente cu ta aproba y ta yega te cerca Su Excelencia Gobernador y tin cu wordo publica den Landscourant. Ta rekisitonan legal, den e caso manera esaki, e departamento huridico di gobierno a haya e documento aki. Nan a wak e documento, nan a recomenda cierto cambionan den nan. E cambionan aki a bay bek pa notario. Awor aki ta mira cu 8 di Juli nan a formalis’e na notario. Awor aki loke falta mas bien ta e formalidadnan. Pero oficialmente e sindicato tin un base legal pa negosha y firma un contracto colectivo, segun Anselmo Pontilius.