Esaki ta temporada caminda nos studiantenan ta bay sigui nan estudionan den exterior. Sra. Solange Tchong, vocero di AZV ta splica.
Tin casonan caminda cu e studiante ta bay sin kita su nomber for di e registro di AZV. Den e caso aki un mayor por haci esaki pa e studiante. E ora un mayor por bin toch cu e caarchi y un identificacion, pa asina AZV por sa cu ta trata di un mayor di un studiante. Pero atrobe AZV ta kere cu por resolve e asuntonann aki di delanta y e posibilidad tey. AZV a tuma contacto cu Departamento di Enseñansa y hunto cu nan a dicidi cu diabierna awo, 28 di Juli lo por duna e servicio aki. E horario lo ta di 1 or pa 4 or.
Sa tin otro studiante cu a schrijf uit caba, ya cu nan kier bay mas trempan. E ora esey ta ok. Ta pidi si pa pasa na AZV cu comprobante cu bo a schrijf uit di Censo, cu bo paspoort, bo carchi di AZV, y bo ticket di biahe. E ora ey lo bo haya un comprobante for di AZV.
E seguro di AZV ta keda valido te na e momento eigenlijk cu e studiante a subi avion. Dus, si e studiante a trompica pia, na e trapi subiendo avion, ainda e studiante por wordo yuda. Esaki ta hustamente e tipo di casonan aki, cual por cierto AZV a yega di haya un of dos deb pasado, cu tabata fastioso, ya cu e studiante no a percura pa bay AZV.
Sra. Tchong, a trece un otro ehempel: studiantenan cu a sali toch y ta keda cu e carchi, despues di dos of tres aña nan ta bin bek, sin pasa AZV bek. Den casonan asina, AZV kier a pidi e studiante pa tuma nota, cu AZV ta den contacto cu Censo, unda nan ta na altura ken ta biba na Aruba y esun cu a bay caba, y cu ta bin bek Aruba. Pa nan ta mesun importante meld bek na AZV, segun Sra. Solange Tchong, vocero di AZV.