PIERCE COUNTY, Washington – Un pareha di e estado di Washington, ta confrontando varios cargo den nan contra, despues cu polis a bisa cu e mayornan tabata biba cu nan tres yiu chikito den un cas yena cu sushi di djaca y hangua di droga y tabata inyecta nan cu heroina, cu nan tabata yama e remedi “pa sinti bon”.
Ashlee Hutt, 24 y Mac Leroy McIver, di 25, a wordo acusa di ilegalmente suministra un substancia controla na un persona bao di 18 aña, maltrato criminal den di dos grado y y asalto di un mucha den di dos grado, di acuerdo na un causa probabel registra den Corte Supremo di Pierce County, na September, a base di un incidente cu a sosode na Spanaway.
Hutt a aparece den corte dialuna pa su caso, di acuerdo na News Tribune. Registronan ta mustra cu e tabata cera riba un fiansa di $100 mil.
McIver, kende su caso a bin aden na September, tambe a wordo teni cera riba un fiansa di $100 mil.
“E muchanan tabata biba den condicionnan deplorabel,” segun vocero di e Departamento di Sheriff di Pierce County, Detective Ed Troyer, ora cu el a conta na Washington Post diamars. “E no tabata un situacion bon pa biba aden, hasta sin e uzo di heroina.”
“Desafortunadamente nos a haya e muchanan ta biba den condicionnan deplorabel, pero nos no a mira e mayornan intencionalmente duna e muchanan droga,” el a agrega.
Ta trata aki di muchanan di 2, 4 y 6 aña di edad, caminda cu heroina tabata wordo suministra pa nan pega soño.
Muchanan a bira victima den un epidemia opioide cu ta manera un trend den e nacion – mira con nan mayornan ta spuit nan mes, y tin biaha nan ta haya un sobredosis y ta fayece.
Na September, por a mira un potret caminda cu por mira e inocencia perdi riba cara di un mucha di 4 aña na East Liverpool, Ohio, caminda cu un homber y un muhe tabata gesak den otro despues di a haya un sobredosis den un vehiculo; e mucha ainda tabata mara den su sienta den e auto.
Fuente: SFGate