Mayornan di Zinia Croes, kende a perde su bida despues cu un agente policial a dal’e cu auto, a dicidi di tuma paso contra di Ministerio Publico. Abogado di famia Croes, mr. Sven Faarup ta splica.
Ministerio Publico a manda un carta dia 7 di Juni 2017, unda nan ta confirma cu nan fiscal lo no bay persigui e persona cu a causa e accidente unda Zinia a perde su bida. E mayornan di Zinnia no ta di acuerdo cu esaki y nan a dicidi di bay Corte di Apelacion, pa wak si berdad si fiscal a tuma e decision corecto door di no persigui e agente policial. Y esaki ta mas bien e siguiente stap cu e mayornan lo tuma.
Cual lo por ta e motibo pa cual a dicidi cu no ta persigui e agente y mr. Faarup a splica cu fiscal a bisa cu e no ta wak cu tin un caso pa por persigui e persona aki. Pero e mayornan ta haya cu si por tin un caso, pero al menos hib’e Corte y laga un Corte dicidi si e ta culpabel of no. E caso ta pendiente y lo bay prepara pa manda e caso Corte di Apelacion.
Tabata tin varios fayo den e investigacion y ta spera cu Corte di Apelacion wak’e di un manera diferente y duna indicacion na fiscal, cu si mester persigui e persona, basa ariba kico tur tin den e file.
Corte di Apelacion ta basa na Corsou y den e proximo simannan lo entrega e procedura, y no lo dura mucho prome cu tuma un decision y mr. Faarup ta spera cu esaki por ta pronto cu lo por tin un decision.
Tin hopi cos ta wordo bisa riba rednan social, y un di nan ta cu e famia ta buscando placa di gobierno cu e caso aki pa cual aki mr. Faarup ta bisa cu no tin ningun indicacion cu esaki tin motibonan financiero su tras. El a enfatiza cu ta trahando pa e caso aki bin dilanti den un Corte.
Segun mr. Faarup ora cu bo tin un yiu cu ta perde su bida den un accidente di auto, bo no ta bay lanta un caso pa motibonan financiero, pero mas bien pa motibonan di principio. Loke mayornan ta buscando ta husticia pa nan yiu. Si Corte di Apelacion no ta bay di acuerdo cu e peticion di e mayornan, pa loke ta lo penal, no lo tin mas caminda di cana, pero si por sigui den un caso civil.
Pero abogado di famia Croes, mr. Sven Faarup a enfatiza cu ta bay paso a paso cu e caso aki.