Manera cu a invita mayornan desde algun dia pasa caba via email, e siman aki mayornan di studiantenan na Colegio Arubano ta bon bini pa ricibi e rapport cerca e Mentor di nan yiu. E mentor ta dedica extra tempo pa combersa cu e mayornan di e alumnonan cu tin mal resultado. Tambe lo presenta e plan di enfoke cu a bini dilanti durante e ‘rapportvergadering’ entre e docentenan, e mentor y miembro di Rectorado.
Ta bon pa enfatisa cu mayornan regularmente tin oportunidad pa topa docentenan di Colegio Arubano. Den luna di september, na comienso di cada aña escolar, Colegio Arubano ta habri su portanan pa ricibi mayornan di tur alumno, den un “anochi di introduccion”. Durante e anochi aki e mayornan ta cera conoci cu e mentor di nan yiu. E mayornan ta haya informacion necesario tocante e dinamica di e klas di su yiu y e reglanan nobo di scol.
E mentor ta duna informacion practico pa prepara pa e prome periodo di “toets”. Den caso di “ciclo basico”, na comienso di aña escolar, e mayornan di e alumnonan den Ciclo Basico 1 ta bini scol pa un presentacion di e materianan cu e alumno ta hayando. Den e caso specifico aki, riba dialuna y diamars ta entrega rapport pero ta sigui awor un “Anochi di contacto selectivo cu e docente”. Pues despues di vakantie, mayornan ta bon bini na scol pa papia cu e docentenan cu ta duna e alumnonan les.
Tur docente, mentor y miembronan di Rectorado lo ta presente na scol pa combersa cu mayornan. E mayornan mes ta selecta e docentenan cu e ta desea di papia cune. E docente y e mayor ta evalua e resultadonan di rapport y ta comunica tocante e trabou y actitud di e alumno. Atendencia na e anochinan di contacto y informacion ta un forma pa e mayornan demostra nan envolvimento cu scol. E cifranan ta demostra cu mas e alumno avansa den su añanan di estudio na Colegio Arubano, menos e atendencia di mayor na e anochinan di contacto ta.
Por ehempel e atendencia di mayor di un alumno di Ciclo Basico 1 of 2 ta entre 90-95%. E atendencia di mayor di un alumno di VWO 5 ta entre 70-75%.
Den e ultimo añanan Colegio Arubano a trece cambio pa hisa e atendencia na e anochi di contacto cu e docentenan y haci esaki mas eficiente. E mayornan ta registra di antemano cerca e docente cu e ta desea di papia cune y e ta duna un orario di su preferencia.
Colegio Arubano ta compila un lista di cita pa cada mayor y ta manda esaki adelanta pa nan. Educacion ta un triangulo forma dor di tres pia: e mayornan, e alumno y scol. Si un di e tres pianan cay, e triangulo completo lo cay tambe. Investigacion ta comproba cu tin un enlace entre e envolvimento di mayor cu scol y e prestacion di e yiu na scol.
Mas envolvimento e mayor tin cu e estudio di su yiu, miho e prestacion di e yiu ta. E yiu tin miho chens pa pasa su añanan na scol sin retraso; ta atende scol mas frecuente; tin miho habilidad social y bon comportacion na scol; ta gradua y ta sigui su estudio avansa. Contacto ta un di e medionan cu Colegio Arubano ta uza pa mehora e envolvimento di mayornan cu scol. Comunicacion ta e base di confiansa entre mayor y scol.
Banda di e anochi nan di contacto, Colegio Arubano tin un “leerling volgsysteem” cu tur mayor y alumno tin acceso na dje. Aki e mayor por sigui di hopi cerca, e atendencia na scol di nan yiu. Tambe e mayor por mira e cifranan y resultadonan. Colegio Arubano ta comunica via e medio aki cu tur mayor. Tambe scol tin email adres di tur mayor unda nan ta ricibi informacion regularmente for di scol.
Colegio Arubano ta percura di su banda pa guia e alumnonan y ta percura pa ofrece un ambiente di educacion optimal. E mentor ta e prome yama pa mantene e liñanan di contacto habri entre mayor y scol. Pa cada “jaarlaag” tambe tin un coordinador cu ta monitor e desaroyo di e alumnonan. Den e cuadro social, Colegio Arubano tin un zorgteam cu ta consisti di dos trahado social. Pa duna e guia pa escogencia di estudio tin un decanaat y tambe tin un team cu ta ofrece ayudo cu huiswerk y desaroyo di habilidadnan social.
E envolvimento di mayor ta e compromiso y participacion activo di parti di e mayornan cu e scol y cu e yiu. Por wordo expresa den diferente otro forma tambe: participacion na trabou boluntario pa e scol, forma parti di un comision di e scol. Den e cuadro aki Colegio Arubano ta corda tur mayor cu ta existi un comision di mayor. E comision aki ta envolvi di hopi cerca cu e desaroyonan na scol. E comision por haci hopi uzo di mas envolvimento di mayornan pa asina yuda na mehora aspectonan importante pa e alumnonan y Colegio Arubano. Por tuma contacto cu OCCA (oudercommissie Colegio Arubano) na email [email protected].