Un Siman di incertidumbre ta tras di lomba despues cu Conseho di Minister y un mayoria den Parlamento a informa Gobernador di Aruba, cu nan ta retira confianza for di sra. Marisol Lopez-Tromp como Minister di Gabinete Wever-Croes.
Tabata diahuebs siman pasa cu, durante reunion di Parlamento pa trata e gedoogbeleid pa tiramento di pisca, Fraccion di Partido MEP a presenta un mocion di desconfiansa contra sra. Marisol Lopez-Tromp. E mocion aki a genera un controversia, tanto den Parlamento como den nos comunidad, mirando cu un wega politico di parti tur fraccion a wordo implementa. 1 Siman largo por a tende diferente version for di e diferente skinanan den Parlamento, unda cu hasta kehonan oficial a keda entrega na Ministerio Publico.
Pero awe, 1 siman despues, 1 carta bastante fuerte for di Gobernador a resulta den retiro inminente di sra. Marisol Lopez-Tromp como Minister di Desaroyo Teritorial, Infrastructura y Medio Ambiente, ora cu Fraccionnan di MEP, POR y RED a apoya e decision di Conseho di Minister pa retira e mandatario aki for di su funcion.
Kico lo ta e siguiente acontecimento den e arena politico di nos pais? Nos tin di keda pendiente pa mira esaki ainda. Pero loke ta sigur aworaki ta cu sra. Lopez-Tromp a perde e bataya pa mantene su mes como Minister di Gabinete Wever-Croes.