BERLIN, Alemania – E pleno di Parlamento Federal Aleman a aproba diabierna e legalisacion di matrimonio homosexual. Un proyecto impulsa pa e socialdemocratanan (SPD) – kibrando e acuerdo di coalicion cu conservadornan di e canciyer, Angela Merkel – den un aliansa inedito cu e berdenan, e izquierda y e bloke democratacristian. E iniciativa, faltando tres luna pa e eleccionnan general, a ricibi e respaldo di 393 diputado. Merkel, e hefe di e grupo Parlamentario democratacristian, Wolfgan Kauder y otro 224 parlamentario, a vota en contra di e proyecto cu ta recoge pa e parehanan di distinto sexo, e mesun derechonan cu pa esnan heterosexual – incluyendo adopcion. Ta di spera cu e cambio legal aki drenta na vigor prome cu final di aña na Alemania. E pais aki lo pasa di ta, asina, e number 24 den legalisa matrimonio igualitario, cu ya ta un realidad den otro paisnan manera Spaña of Merca. Na Europa, ainda tin un cantidad di pais cu e opcion aki no ta posibel, manera Austria, Italia of Grecia. Tambe den paisnan den e parti Oost di Europa.
E debate riba matrimonio gay a aviva na Alemania tras di e cambio di postura di canciyer Merkel y cu e escenario di e precampaña electoral den fondo. E canciyer a sorprende dialuna cu a pasa durante un acto organisa pa e revista femenino Brigitte ora di a despega e “no” rotundo cual tabata tin e votantenan acostumbra na ora di papia di matrimonio entre personanan di e mesun sexo pa indica cu e ta habri na un “voto di conciencia” di e diputadonan Aleman. Na Alemania, desde 2001 unionnan civil di personanan di e mesun sexo ta permiti desde 2001, pero sin pleno igualdad huridico y derecho, manera adopcion.
Diadomingo, den su Congreso extraordinario, SPD a fiha e legalisacion di matrimonio igualitario como condicion imprescindibel pa reedita un aliansa nobo cu e partido di Merkel tras e eleccionnan legislativo cu lo tuma luga na September. Y mescos cu e Berdenan y e partido di Izquierda, cu a hunta cu e Bundesrat – e Camara di representacio di e estadonan federa – a persigui durante varios aña un proyecto di matrimonio igualitario. Algo cu e partido conservador di Merkel semper a resisti y cu SPD no a persigui pa no provoca un crisis den Gobierno di coalicion. Diamars, e lider di SPD y candidato pa canciyeria, Martin Schultz a tuma e palabra for di Merkel y a pidi cu e matrimonio igualitario wordo vota inmediatamente. Tres dia despues, el a legalisa.
“P’ami, matrimonio ta, segun nos Constitucion ta mustra, un union entre un homber y un muhe, y p’esey mi a vota contra e proyecto di ley,” Merkel a señala na prensa, despues di e votacion. Y asina parce den e carta magna Aleman, algo cu un grupo di parlamentario democristian tin plantea pa alega den un recurso na Constitucional. Sin embargo, e canciyer a comenta cu el a cambia di opinion, riba e adopcion pa parehanan di e mesun sexo, y loke antes e tabata opone alegando e “bienestar” di e menornan. “Mi ta spera cu e votacion awe no solamente promove e respet na distinto opinion, sino cu tambe trece mayor cohesion social y paz,” el a añadi.
E asociacionnan di derechonan civil a celebra e paso di Alemania, cu a yega incluso despues cu e catolica Irlanda, a aproba matrimonio homosexual, ya dos aña pasa. Decenas di persona a sali riba cayanan na Berlin pa celebra e historico dia. Cu banderanan di regenboog of paraplu pa proteha nan mes, ademas di awasero – un bon cantidad di nan a concentra dilanti di e canciyeria. Conny y Ramona, un pareha kendenan ta biba hunto desde un aña y mey, tambe a participa na e fiesta. “Nos ta feliz di por casa y tur esaki ta posibel danki na e trabao cu e Berdenan a haci,” Conny, experto den finansas den un empresa di siguridad di 33 aña a felicita, cubri pa e bandera multicolor di LGTBI. “Angela Merkel, ta un persona hopi inteligente y ainda mi no ta compronde pakico e ta opone na matrimonio igualitario. Pero esey en parti ta danki na dje cu Bundestag a aprob’e. Esaki ta un gran dia pa e comunidad gay di Alemania,” el a bisa, feliz di por casa cu su pareha, Ramona, trahado social di 28 aña, kende lo bira mama den cinco luna.
“Despues di varios aña di espera y speransa, e famianan arcoiris na Alemania lo ricibi awo e mesun reconocimento ante ley. Esaki ta un hito historico cu ta insipra ainda mas cambio pa personanan LGTBi,” Evelyne Paradis, directora ehecutivo di ILGA a bisa, cu ta agrupa e asociacionnan di henter mundo. “Esaki tabata e resultado di añanan di persistencia y awo ta e momento di Alemania. Matrimonio igualitario no ta e destino final. Personanan LGBTI y nan famia mester sinti nan mes sigur y apoya den tur nan faceta di nan bida, dentro di e registronan civil, pero tambe p’afo,” el a añadi.
Den pleno 2017, relacionnan sexual entre personanan di e mesun sexo ta ilegal, ainda den por lo menos 72 pais – e mayoria di homber: den 45 di nan, tambe cu muhe -. Y den 12 di nan (of parti di nan teritorio) por yega na paga cu morto, como ILGA a apunta den e informa, cu lo wordo publica dialuna awo. Cuater pais – Saudi Arabia, Iran, Yemen y Sudan -, parti di Somalia y 12 Estado di Nigeria, ta recoge nan den nan leynan e pena capital pa e relacionnan aki. Actornan no estatal (fundamentalmente Estado Islamico) ta wordo aplica na Irak y Siria. Ademas Qatar, Mauritania, Pakistan y Emiratonan Arabe Uni ta mantene e posibilidad di aplica nan, aunke no ta existi evidencia di ehecucion den e ultimo añanan pa relacionnan consensual den priva.
Fuente: http://internacional.elpais.com