Aña Escolar 2016/2017 a caba di cuminsa, como tal IBiSA ta desea tur alumno, docente y tur scol di Enseñansa Basico y Enseñansa Avansa un aña di estudio exitoso. IBiSA ta spera di por conta riba un participacion grandi di schoolnan na actividadnan y competencia deportivo escolar durante e aña aki. Pronto competencianan deportivo entre scolnan lo start, pa cual ta motiva nos muchanan pa puntra na scol pa e schedule di competencia deportivo.
En conexion cu e actividadnan deportivo, IBiSA ta anuncia cu a ricibi algun material deportivo nobo pa instructornan por haci uzo di dje durante les di deporte na school. E materialnan aki lo wordo distribui proximamente na cada instructor. Ta encera material pa deporte di futbol, volleyball, basketball y trefbal.
Tambe IBiSA ta contento di por informa cu tin algun material di ‘bruikleen’ nobo. Esaki ta materialnan deportivo cu organisacionnan den comunidad por fia ora nan ta organisa actividadnan deportivo, sea pa comunidad of gruponan specifico den nos comunidad. E servicio aki ta gratis. Na e mesun momento nos ta haci un suplica na comunidad ora di presta material di IBiSA, pa cuida esaki y entreg’e atrobe limpi y den e mesun estado cu a haye, pa asina nos por sigui duna e servicio aki na tur cu ta pidi’e.
