Despues di casi 6 luna di planificacion y trabaonan di preparacion EZ Party Solutions den cooperacion di Aruba Airport Authority ta contento di por anuncia cu e idolo di e muchanan chikito Masha y su amigo Bear lo ta yegando e isla di Aruba diamars awor pa 4:30 di atardi. Masha and the Bear ta un cartoon crea door di Oleg Kuzovkov di Rusia y produci door di Animaccord Animation Studio na Moscu. E show ta conta storianan di un mucha muher yama Masha y su aventuranan hunto cu su amigo Bear cu semper ta salba Masha di haci un desaster. E prome show yama “How they met” a bay den aire pa prome biaha dia 7 di Januari, 2009 y despues di su exito na Moscu el a wordo traduci den 25 diferente idioma y a wordo lansa tanto riba Netflix como NBC Universal. Durante un sondeo cu EZ Party Solutions a haci na aña 2015 bou di muchanan di 2 te cu 10 aña a bin sali afor e popularidad grandi di Masha na Aruba y asina a bay over na crea un show local di Masha conhuntamente cu diferente gruponan di baile di mucha cu lo keda presenta den Cas di Cultura dianan 9, 10 y 11 di September den Cas di Cultura.
Diamars hunto cu Masha y su amigo Bear tambe lo ta yegando Officer Judy di e pelicula Zootopia y tambe pa di prome biaha na Aruba e figuranan di Angry Birds. Un invitacion ta bay pa e mayornan trece e muchanan aeropuerto International Reina Beatrix pa 4:30 di atardi pa asina hunto nos yama Masha y su amigonan un coordial Bon Bini na nos isla di Aruba. Despues di nan yegada nan lo bay direct na Impex e cas di uniform na Sividivi unda nan lo keda te cu 6or di atardi pa saluda y saca potret cu muchanan. Mirando cu e shownan di dia 9, 10 y 11 ta completamente sold out EZ Party Solutions cu cooperacion di e gruponan di baile y Cas di Cultura a logra pone un extra dia di show disponibel cual lo bira diasabra 17 di September pa 7or di anochi. E entrada pa e show aki lo ta exclusivamente disponibel diamars awor durante e yegada di Masha na Impex of yamando EZ Party Solutions na 600-7000. Pa esnan cu ta buscando e shirtnan di Masha and the Bear ainda tin un cantidad limita disponibel na Impex, pues busca dibo liher pa asina bo tin’e pa bay cun’e airport diamars pa yama Masha Bon Bini na Aruba.