Mas y mas mucha na Aruba sea ta nace of ta haya problema cu bista na un edad sumamente trempan.
Sra. Sari Wernet, terapista di revalidacion di FAVI ta splica tocante di conscientisacion en conexion cu Dia Internacional di Garoti Blanco cu Strepi Cora.
Full e siman FAVI ta hopi activo ariba caya, nan a cuminsa riba e Green Corridor, pariba di brug. Nan a bay cu nan clientenan pa asina pa uno, stimula e uzo apropia di cana cu e garoti y tambe pa haci demostracion di crusa caya cu e garoti corectamente. Esaki a bay hopi bon. Y FAVI ta hopi contento. Nan tin varios aña ta organisa e actividad aki. Y e meta principal ta pa conscientisa e comunidad y tambe e automobilistanan.
Ta danki na esfuerso di trahadonan di FAVI pero tambe di polis, e comision di trafico, cu a hinca e importancia di FAVi den e trafico, ta haci cu awendia e clientenan ta sinti nan mes un poco mas sigur pa crusa den e cayanan di Aruba. Dus trafico ta para y e bon ta, cu nan ta zona nan pitro ora cu ta duna e chens sea ora cu e persona a crusa caba of pa saluda. Esaki sigur ta algo positivo.
Tambe FAVI hunto cu su clientenan a bay ariba LG. Smith Boulevard for di CITGO Boulevard te cu Hamaka, haciendo e demostracion cu e garoti, crusa un paar di biaha pero tambe pa automobilista y tambe comunidad mira nan. Aki na Aruba bo no ta wak hende cu problema di bista na Aruba, pero ora di sali pafo, bo ta ripara cuanto tin.
FAVI a pone extra atencion tambe ariba e chikitonan, cu tin problema cu bista. En berdad, nan no ta crusa caya nan so, pero nan ta cu nan mayornan. Aki paar di aña nan tambe lo ta forma parti di nos trafico.
Aruba tin un situacion, unda cu mester tene cuenta cun’e, ya cu nan ta hopi. Actualmente FAVI tin 7 mucha usario, cu tin nan garoti y guia pa e bida diario. Tin mas cu lo mester cumisna uz’e, pero cuminsa uza e garoti no ta facil, ni pa e mucha ni tampoco cu e famia. Asina mes tin algun cliente hoben di FAVI cu si ta uza e garoti den nan bida diario, cu e meta pa nan mobilisa. E problema di bista no ta algo cu ta sosode cerca hende grandi, pero cerca muchanan caba.
Sra. Wernet a splica cu 80% di problema di bista tin solucion pe, segun estudionan di World Health Organisation. Hopi no kier reconoce cu nan tin problema cu bista, te ora cu nan haya problema cu bista cu ciencia no por haci nada mas pe. FAVI ta contento cu e apoyo cu nan ta ricibi, pa e trafico keda atento pa e clientenan, no solamente e chikito, pero tambe pa e grandinan. Pa tene cuenta cu tur hende.