Beach Tennis, sin duda algun, un deporte cu ya no mester di introduccion na Aruba. Cu mas di 800 hungado local, kende nan ultimamente ta haciendo lo maximo pa bay den exterior, pa por crece y conoce e mundo di Beach Tennis internacionalmente.
Den e transcurso di e ultimo simannan, algun di nos hungadonan local di Beach Tennis, a participa na diferente torneo internacionalmente. Aki nos ta referi na Anne Hoogendam, Marieke Buuts, Maud Celaire, Nikai vd Meer, Sander Castro, Wayne Tromp y Aksel Samardzic. Via e torneo nan aki, nos hungadonan local ta purba di yega mas leu posibel, ganando mas wega posibel pa asina por hisa nan ranking mundial.
E ultimo torneo cu nan a participa ta na Puerto Rico, caminda a organisa un ITF G2. Akinan Aksel hunto cu su partner Vini a logra bay cu e victoria y Anne hunto cu su partner Julie di SXM a logra yega te semi final. E participacion di e hungadonan local tambe ta surti como preparacion pa algun biahe cu tin planea den zomer vakantie nos dilanti, caminda tin e ITF Beach Tennis World Team Championship na Rusia y tambe e Beach Tennis World Championship cual lo wordo efectua na Cervia, Italia. Varios di nos hungadonan lo participa na Cervia y BTA ta den fase final pa por informa si Aruba, pa prome biaha, lo participa na e mundial di ekipo na Rusia. Beach Tennis kier a tuma e oportunidad aki ya manda un palabra di pabien na Anne, Aksel, Nikai, Wayne, Sander, Maud y Marieke pa nan prestacion den exterior representando nos bandera orguyosamente.
Na esunnan cu ainda no a mira con ta practica e deporte aki, nos ta warda boso na Tropicana Beach Tennis Club. Pa mas informacion boso por bishita nos FB page of riba www.beachtennisaruba.com