SEATTLE, Merca- Un total di 13 leon marino a wordo haya morto durante e ultimo dos lunanan na e costanan di Seattle, noordoost di Merca, según e corante The Seattle Times.
Aunke e poblacion di leonnan marino na e costanan di Seattle a pasa di 90 mil na 1975 pa mas di 250 mil na 2014, medionan local a destaca cu e aumento a coincidi cu e aumento di atakenan di parti di piscadonan den e zona.
Piscadonan ta considera cu e mamiferonan ta limita e volumen di e salmon cora, pa cual nan a ataca algun poblacion di leonnan marino indiscriminadamente. E hayasgo di curpanan cu impacto di bala y traumatismo a pone cu autoridadnan a cuminsa un investigacion den e zona.
Robin Lindsey, cu tabata forma parti di un grupo di boluntario cu ta investiga informenan di mamiferonan morto y benta ariba e costa a bisa na FOX cu e tiroteo contra di e leonnan marino a aumenta confrome e temporada di pisca ta yega na final di lente.
E servicio nacional di Pesca Marino di Merca a anuncia un proceso di investigacion riba e matansa di e leonnan, cual ta prohibi pa ley y por caba den boetnan di mas di 28 mil dollar. E gruponan conservacionistanan den e zona tambe a ofrece un recompensa di 5 mil dollar pa ken por duna informacion riba e responsabelnan di e delito aki.
Datonan di gobierno federal a señala cu entre 1998 y 2017, mas o menos 700 leon marino a wordo haya dilanti e costanan di California cu heridanan di bala of hinca.