PUKHRAYAN, India – Mas di shen hende a muri y rond di 120 a resulta herida diadomingo den un catastrofe nobo di trein na India, ora cu varios vagon a sali for di e railsnan di un trein en marcha den e estado norteño Indio di Uttar Pradesh.
E accidente a tuma luga durante e marduga cerca di e localidad di Pukhrayan, den e districto di Kanpur, mientras cu mayoria di e pasaheronan tabata drumi, loke a impedi nan reacciona na tempo.
Imagennan di television di e siniestro tabata mustra partinan di e trein converti den un ruina di hero, despues cu e vagonnan a dal contra esunnan cu a descarila prome.
Di acuerdo cu e ultimo recuento, e cantidad di morto a subi na 116, e subcomisario di polis di e districto Pavitra Mohan Tripathi, a declara.
Segun Tripathi, labornan di identificacion di e cadavernan a resulta extremadamente complica debi cu hopi di e fayecidonan a keda hopi desfigura door di a wordo aplasta pa e boksmento despues di e derailing.
Den e accidente 14 vagon a wordo afecta, segun e vocero di e Forsa Nacional di Respuesta di Desaster desplega na e luga di e siniestro, Anil Shekhawat.
Gobierno di Uttar Pradesh a indica riba su cuenta oficial di Twitter cu por lo menos 121 persona a wordo hospitalisa.
E causanan?
“E causanan di e accidente ainda no a wordo determina,” un vocero di e zona Nort y Central di e Red di Trein Indio, RD Bajpayee, a bisa.
E minister Indio di Trein, Suresh Prabhu, a skirbi riba su cuenta di Twitter cu unidadnan medico mobil a wordo traslada di inmediato na e luga di e accidente pa parti articulonan di prome necesidad entre e supervivientenan cu a resulta ileso of heridonan leve.
E trein a cubri e recorido entre Patna, den e estadio septentrional bisiña di Bihar, y Indore, un localidad di e estado central di Madhya Pradesh, situa mas of menos 700 kilometer zuid di e luga di e accidente.
Ministerio di Trein (Ferrocarril) a anuncia compensacionnan economico di 350 ruppies (5100 dollar na famia di e fayecidonan, 50 mil ruppies (730 dollar) pa e heridonan grave y 25 mil ruppies (365 dollar) pa esnan leve.
Na 1995 mas di 250 persona a muri y otro 230 a resulta herida ora cu dos trein a dal contra otro cerca di e ciudad di Agra, na Uttar Pradesh y na 1999 e colision di otro dos trein den e estado oriental di Bengala a causa 288 morto.
Ya den e siglo aki, na 2002, a fayece 118 perosna door di derailing di varios vagon den e estado di Bihar y aña pasa, den e ultimo siniestro di trein di consideracion, 34 persona a perde nan bida den un accidente similar na Uttar Pradresh.
Fuente: NTN24