SANAÁ, Yemen- Mas di 80 mil mucha bou di 5 aña a muri di hamber desde cu e hostilidadnan den e guera di Yemen, cu ta bayendo pa su di cuater aña, a intensifica. Esaki ta segun un informe revela pa e ONG, Save The Children.
E calculonan di e organisacion, cu datonan recogi pa ONU, ta pone na 84.701 e total di muchanan cu malnutricion grave cu e muri entre april 2015 y october 2018, segun datonan revela den e ultimo oranan ariba su portal.
“Pa cada mucha morto door di bom y bala, un dozijn ta muri di hamber y esaki ta algo cu por wordo preveni completamente”, e directora di e ONG na Yemen. Tamer Kirolos. a sigura. El a expresa su “horor” di cu casi 85 mil mucha na Yemen a muri door di hamber extremo”.
Muchanan cu ta muri dor di hamber “ta sufri enormemente segun e funcionnan di nan organonan vital ta disminui pa despues stop totalmente”, el a splica. Kirolos a resalta cu nan sistema inmunologico ta asina fragil cu “nan tin mas chance di haya un infeccion y algun di nan ta asina debil, cu nan no por ni yora mas”.
“Mayornan mester wak con nan yiunan ta caba poco poco, sin cu nan por haci nada pa nan”, Kirolos ta sigui bisa.
Despues di e intensificacion di e conflicto, 14 miyon persona ta core riesgo di muri di hamber, un number cu “a aumenta dramaticamente”, desde cu e coalicion Arabe, lidera pa Arabia Saudita a impone un blokeo maritimo y aereo cu a haci e insiguridad alimentario den e pais mas ainda.
For di e tempo ey, e ONG a bisa, e importacionnan di alimento a traves di e waf di Al Hudeida, unda cu actualmente tin un bataya sangriento tumando luga, a reduci na mas di 55 mil ton metrico mensual, “suficiente pa satisface e necesidadnan di 4.4 miyon persona, incluyendo 2.2. miyon mucha”.
Durante e tempo aki, Save The Children a zorg pa alimento pa 140 mil mucha y a duna tratamento na mas di 78 mil mucha cu desnutircion desde e comienso di e crisis.