E hombernan Colombiano J.L.(38) y e dos Venezolano C.R.(36) y J.P.(59) awe mainta a presenta dilanti Hues pa e caso penal cu Ministerio Publico a cuminsa contra nan. Nan tres ta wordo acusa cu riba 28 Juli 2022 nan tabata importa 456 kilo di cocaina y J.L. tabata den posecion di un peña di arma di candela cu balanan aden.
MAS NOTICIA por a compronde cu Guarda Costa a los tironan di advertencia pa e boto a para. E trio a bin Aruba special pa entrega droga.
MARINA COLOMBIA A NOTIFICA GUARDA COSTA
Hues a puntra e trio si nan a importa e 456 kilo di cocaina. Tur tres a admiti. Hues a bisa cu dia 27 di Juli 2022, Guarda Costa a haya informacion di marina Colombiano cu un go fast a sali cu cargamento di droga. Un boto di Guarda Costa a sali ora a constata e boto riba radar. Tabata 10.13 di anochi ora boto di Guarda Costa a intercepta e boto den awa territorial di Aruba.
GUARDA COSTA A LOS TIRONAN
Guarda Costa a duna señal pa para, pero nan no a para y a sigui core. A surgi un persecusion y e boto a bay for di awa territorial pero Guarda Costa a sigui su tras y a los tironan di advertencia. E ora ey e boto a para. Tabata mas o menos 11’or di anochi, ora cu personal di Guarda Costa a subi riba e boto pa haci investigacion. E momento ey e boto tabata den e area di pisca di Aruba. A listra den boto cu tin dos compartimento y a bin haya un cantidad di bultonan di droga. E miembronan di Guarda Costa a haya J.L. cu un peña di pistool cu balanan. Guarda Costa a touw e boto pa Savaneta pa mas investigacion.
456 KILO DI COCAINA CONFISCA
En total a haya 19 bulto di cocaina den e boto y a confisca esakinan. Investigacion a mustra cu e peña di pistool tabatin 13 bala 9 mm. Tur tres sospechoso a keda deteni. En total e 19 bultonan a pisa algo mas di 456 kilo
TRIO A BIN ARUBA SPECIAL PA TRECE DROGA
J.L. a wordo interoga pa Polis y e tabatin un cellular cun’e. Den e cellular tabatin combersacion ”chat” cu un otro persona tocante e traficacion di droga pa Aruba. J.L. a bisa cu 23 Juli 2022, un persona Colombiano a papia cun’e pa trafica droga. E palabracion tabata cu J.L. mester a percura pa dos otro persona. E no tabata sa ki droga mester a transporta. El a haya adelanta 200 mil pesos. Segun J.L. e tabatin cu tira bista riba e droga. El a cumpra gasoline pa e boto. J.P. tabata e capitan. Un jeep a hiba e bultonan di droga y hendenan a baha esakinan y hinca den e boto. J.L. a bisa cu ora a mira Guarda Costa, a purba scapa. Segun J.L., tur hende tabata sa di e cantidad di droga y cu tabata transporta droga. J.L. a bisa cu el a haya un arma di candela for di esun cu a encarg’e cu e droga. Ora el a mira Guarda Costa, el a tira e arma di candela afor den laman. El a bisa cu el a haya 2 peña. Esun den su carson, cu miembronan di Guarda Costa a haya, el a lubida di benta afor. El a bisa cu e intension tabata pa trece droga na un isla serca di Aruba y bay bek Colombia. J.L. a bisa cu el a haci esaki pa placa. J.P. sa e ruta di navega y pesey e tabata e capitan. Despues J.L. a declara cu el a duna bek e arma di candela na e persona y a lubida di debolbe e peña.
E capitan J.P. a declara cu un tal Enrique a pidi’e pa navega e boto cu droga. El a wordo ofreci 2 mil dollar. J.P. a pidi un adelanto pa su famia. Enrique a dun’e 500 dollar. Segun J.P., nan mester a bay na e isla Las Aves caminda lo topa cu un boto pa entrega e droga. Ora el a bay na e beach pa subi e boto cu e mester navega, ya caba e otro dos personanan tabata abordo. El a bisa cu e Colombiano abordo J.L. mester a percura pa tur cos. E Colombiano tabatin un cellular cora pa contact e otro persona. El a bisa cu e sa cu el a haci malo pero door di situacion financiero malo el a accepta. El a bisa cu e Colombiano tabatin un arma cun’e. E no sa kico e Colombiano a haci cun’e. Por ta el a bent’e den laman.
Hues a bisa cu den e 19 bultonan, a haya 462 paki di cocaina cu a pisa algo mas di 456 kilo. Ta asina cu e droga ya a wordo destrui.
FISCAL
Fiscal a bisa cu e ta haya legalmente proba cu e trio aki a importa 456 kilo di cocaina. Ariba e anochi di 27 pa 28 Juli 2022, Guarda Costa a intercepta e boto. Tur tres tabata sa cu tabatin droga abordo. Fiscal a bisa cu e boto aki ta un di e hopinan cu a keda intercepta pa Guarda Costa. Nan tabata forma parti di e mundo di droga cu ta fomenta hopi problema den famianan y criminalidad. Pa cu e castigo, Fiscal a bisa cu e ta orienta su mes riba casonan similar. El a exigi 5 aña y 6 luna di prison pa J.P. y C.R. Pa J.L., Fiscal a exigi 5 aَña y 7 luna di prison pasobra e tabatin e peña cu bala cun’e. Fiscal a exigi pa e boto keda confisca, e droga ya a wordo destrui y pa destrui e peña cu balanan. E cartera cu placa cu a haya J.L. cun’e lo keda confisca, pasobra esey ta e placa cu el a haya for di e Colombiano.
SENTENCIA
Hues a sera tratamento di e caso y a dicta sentencia di biaha. Hues ta haya legalmente proba cu e trio a importa un lote grandi di cocaina. Tur tres a admiti di a trece droga. Pa cu e castigo, Hues a bisa cu e ta tene cuenta cu droga ta trece tristeza den famianan. E trio a coopera cu esaki. Tambe Hues a tene cuenta cu aki ta trata di un lote grandi di cocaina. Hues a bisa cu segun orientacion di castigo cu Corte di Husticia ta duna, pa 100 kilo a duna 5 aña. Hues no ta haya e castigo exigi pa Fiscal ta exagera. El a confirma exigencia di Fiscal. Hues a condena J.P. y C.R. na 5 aña y 6 luna di prison. J.L. a haya 5 aña y 7 luna di prison. E boto ta keda confisca, e droga ya a wordo destrui y e cartera cu placa di J.L. lo keda confisca. E peña cu balanan tambe ta wordo destrui.
