BEIJING, China- Al menos 44 persona a muri y 30 mas a resulta herida diaranson den un explosion sigui pa un candela cerca di e un planta kimico di Zhangjiakou, un ciudad Chines cu lo ta sede di e Weganan Olimpico di Invierno di Beijing 2022. Esaki ta segun informacionnan di AFP.
E explosion a destrui 38 truck y 12 auto, cu a wordo destrosa door di e candela den e fabrica di e grupo Hebei Shenghua Chemical na Zhangjiakou, un ciudad situa na 200 kmn noordwest di Beijing, autoridadnan local a anuncia ariba e red social Weibo.
E heridonan a wordo hiba pa un hospital. Autoridadnan no a precisa cual tabata e motibo pa e explosion.
Riba video y potretnan difundi pa medionan Chines, por wak restonan di trucknan totalmente carbonisa, edificionan totalmente preto door di e huma y bomberonan purbando di paga e candela.
E incidente lo a tuma luga na e porta di e fabrica, ora cu’n truck cu tabata transporta productonan peligroso a explota, provocando cu autonan para den cercania a pega candela, según e portal The Paper, citando un responsabel local encarga di siguridad industrial.
E explosion a laga e mata y yerbanan kima, mientras cu ainda algun di nan tabata kimando, despues di algun hora den e zona golpia pa e candela.
E extenso municipalidad di Zhangjiakou, cu ta inclui un centro urbano y un amplio zona rural, lo ta sede di e competencianan di cross country ski y di snowboard den e Weganan Olimpico di Beijing di 2022.
E planta caminda cu e explosion a tuma luga ta situa na algun decena di meter lue for di e luga di competencia.