COLOMBO, Sri Lanka – Segun e atakenan na Sri Lanka ta continua, autoridadnan a declara toke de queda den full e pais, cu efecto inmediato. E misanan di Pasco di Resureccion di atardi a wordo cancela den pais completo, segun autoridadnan a informa.
Ya caba ta ocho explosion cu a tuma luga na Sri Lanka. Seis explosion a sacudi casi simultaneamente tres misa y tres hotel di luho, na Colombo, e ciudad mas grandi. Tambe den e ciudadnan di Negombo y Batticaloa tabata tin explosionnan, mientras cu e poblacion Cristiano tabata celebra misa di Pasco di Resureccion. Den e atakenan aki mas di 200 persona a muri, lagando al menos 450 persona herida.
VICTIMANAN
Tin al menos 207 persona cu a perde nan bida, di cual 35 ta stranhero, 3 polis cu a muri den e di ocho explosion.
E ultimo dos explosionnan a tuma luga algun hora despues. Prome a informa di un detonacion den e ciudad di Dehiwela, situa cerca di e capital. Segun autoridadnan, e explosion aki a tuma luga cerca den un hotel cerca di e dierentuin nacional, lagando al menos dos victima mortal y 10 persona herida.
Ademas di a anuncia un toque de queda, gobierno di Sri Lanka a cera acceso na rednan social y servicio di manda mensahe, incluyendo WhatsApp, Viber y Facebook, Reuters ta informa.
ADVERTENCIA
E hefe di polis diez dia prome a adverti ariba e posibilidad di un atake suicida, door di gruponan extremista, cu tabata planeando un atake ariba ‘misanan importante’ di e pais.
Diez dia prome cu e atentadonan cu a sacudi varios tempel Cristian y hotelnan di luho den varios parti di e pais, e hefe di polis di Sri Lanka, Pujuth Jayasundara, a emiti un alerta na nivel nacional pa atakenan suicida. Den e explosionnan aki mas di 200 persona a muri, lagando mas di 500 herido.