Pa algun siman caba AHATA y otro gremionan a cuminsa pega e borchinan pa cuida nos beachnan y tambe nos medio ambiente pa cual aki sra Vanessa Rasmussen di Departamento di Medio Ambiente di AHATA ta splica.
ATA hunto cu AHATA, cu Blueblocks y apoyo di polis a cuminsa instala e borchinan na e parti noord di Aruba. E borchinan tin un look rustico, unda cu ta informa, no solamente e turista pero tambe e local pero tambe over di cierto informacion pa tene cuenta cun’e ora nan ta bay na e areanan.
Riba e borchinan tin avisonan manera no tira sushi, pa no core ariba e santo, of ariba e dunesnan. Pa no haci BBQ cu charcoal, pa tene cuenta cu e bida marino, teniendo cuenta cu e turtuganan y nan neishi. Ta hopi importante pa tene cuenta cu esaki, ya cu ta tempo di ponemento di neishi.
E ponemento di borchinan a cuminsa y Sra. Rasmussen ta pidi pa cuida nos naturalesa, sigui e reglanan pa tene nos Aruba, pa hopi aña mas. E borchinan lo wordo poni na e parti noord, den areanan di Wariruri.
Sra. Rasmussen ta sinti cu si e mensahe ariba e borchinan lo yega na tanto local como turista, ya cu e ta poni na dos idioma, dus na Ingles y Spaño, y pa nos localnan cu ta lesa tur dos idioma.
Esaki ta un esfuerso cu AHATA ta haciendo, y ta pidi pa tuma esaki na consideracion.
Polis ta esun cu lo hiba control pa cual sra Vanessa Rasmussen ta splica cu aparte cu nos hendenan local y turista cu lo tin cu tene cuenta cu e reglanan, polis tambe lo yuda reinforsa e reglanan aki, segun Sra. Rasmussen.
Un di e reglanan ta pa no core den santo of e dunesnan. Esaki ta prohibi pa ley y polis por duna boet pa cu esaki. Basicamento por bisa cu AHATA ta satisfecho cu e borchinan aki y tambe lo keda tira bista ariba e mantencion. Door di e clima na Aruba, esey ta haci cu e borchinan por daña lihe.
Pa loke ta trata e sushinan, no tin mucho barinan di sushi, pero esaki AHATA lo wak den futuro kico lo por wordo haci. Aworaki a cuminsa cu e borchinan di aviso, cual a tuma un poco tempo pa a keda cla. E instalacionnan ta bayendo poco poco ya cu e borchinan mester wordo instala cu un base, den e area, segun Sra. Vanessa Rasmussen di AHATA a splica.