Riba diabierna 28 di October, Banco Central di Aruba (BCA) a organisa, den cooperacion estrecho cu Autoriteit Financiële Markten (AFM), De Nederlandsche Bank N.V. (DNB), y Centrale Bank van Curaçao en Sint Maarten (CBCS), un seminario pa e institucionnan financiero cu ta opera den Caribe Hulandes. E seminario, cu a hiba e tema “Promove e Integridad di e Institucionnan Financiero cu ta opera den e parti Caribense di Reino Hulandes”, a tuma luga den Renaissance Convention Center. Tabatin mas cu 150 participante, di cual mayoria tabata representante di e institucionnan financiero estableci na Aruba, e islanan BES, Corsou, y Sint Maarten como tambe di e autoridadnan supervisorio anteriormente menciona.
Despues di e discurso di apertura door di Presidente di BCA, DNB y BCA a presenta diferente topico. E siguiente topiconan, entre otro, a wordi cubri: notificacion di incidente, “klokkenluiders” (“whistleblowers”), e desaroyonan mas reciente den e legislacion di supervision y e maneho di enforsa di BCA. E hefenan di e Unidadnan di Inteligencia Financiero (conoci tambe como “Meldpunt Ongebruikelijke Transacties” of “MOT”) di Aruba, Corsou, y Sint Maarten tambe a duna un presentacion riba e manera cu e institucionnan financiero ta cumpli cu nan obligacion pa raporta transaccionnan inusual. E presentacionnan lo ta disponibel riba e website di BCA (www.cbaruba.org) pronto. E meta di seminarionan asina ta pa concientisa e sector financiero den Caribe Hulandes tocante e tema menciona.