WASHINGTON, D.C., Merca- Un total di 128 pais di ONU a aproba e ley di Asamblea General di ONU. E ley a wordo aproba cu 128 voto na fabor, 9 contra y 35 abstencion.
Esaki ta un resolucion pa rechasa e reconocimento Mericano di Jeruzalem como capital di Israel. E decision, tuma diahuebs durante un sesion di emergencia, ta reitera cu e reconocimento Mericano di Jeruzalem como capital di Israel ta keda sin efecto y mester wordo revoca.
E resolucion di Nacionnan Uni ta contrario na e decision tuma pa e presidente Mericano Donald Trump na comienso di luna, cu ta involucra den e futuro traslado di e embahada Mericano di Tel Aviv na Jeruzalem. Sin embargo, e postura di ONU no lo tin influencia algun den e plannan di Washington, segun e embahadora di Merca den e organo aki, Nikki Halley.
“Ora cu nos haci contribucionnan generoso di ONU, nos ta spera tambe cu nos bon boluntad sea reconoci y respeta”, Haley a declara. E diplomatico a agrega cu e votacion “lo wordo recorda” pa Merca y e “lo marca un diferencia di loke e Mericanonan ta pensa di Nacionnan Uni”.
Haley a señala diamars cu Washington “lo marca e nombernan” di esunnan cu a critica e postura di e pais durante e votacion aki. Trump, di su banda, diaranson a menasa di suspende e ayudo financiero na e paisnan cu lo vota na fabor di e resolucion.