MANAGUA, Nicaragua- E Comision Interamericano di Derechonan Humano (CIDH) diabierna a bisa cu e cantidad di mortonan di e “accion represivo di estado” den cuadro di e protestanan contra di gobierno na Nicaragua a subi na por lo menos 212.
Den un informe divulga, e Comision a apunto cu e “accion represivo di e Estado a produci al menos 212 persona morto te cu dia 19 di juni, 1337 persona a herida y 507 persona a wordo priva di e libertad registra te cu dia 6 di juni”.
“E Comision ta conclui cu e Estado di Nicaragua a viola e derechonan na bida, integridad personal, salud, libertad personal, reunion, libertad di expresion y a acceso na husticia”, segun e informe di 97 pagina.
Den e documento, CIDH a yega na e conclusion di cu e “violencia estatal dirigi na disuadi na e participacion den e manifestacionnan y trapa ariba e expresion aki di desacuerdo politico”.
Pa esaki, e comision a formula un yamado di e gobierno di Nicaragua “a alcansa un solucion constitucional, democratico y pacifico na e crisis di derechonan humano”.
E informe a wordo presenta diabierna den un sesion extraordinario di e conseho Permanente di e Organisacion di Estadonan Americano (OEA) na Washington.
E sesion a cuminsa cu’n minuut di silencio pa e victimanan di protesta cu a sacudi Nicaragua desde 18 di april.