Diadomingo siman pasa Scol di Musica Rufo Wever a presenta den e sala grandi di Cas di Cultura casi completamente yen, un bunita Concierto Estudiantil den 22 acto caminda mas di 100 studiante y nan docente a toca of canta musica hopi varia. Tabatin grupo di canto, instrumentonan di cuerda, marimba, guitara clasico, guitara electrico, cuatro, instrumentonan di biento, piano y percusion cu a deleita e audiencia cu musica clasico, jazz, teatral, Arubiano, Antiano, di Brazil y Argentina.
Como ami ta involucra cu e proyecto di Nuevo Mundo Foundation pa establece un orkesta sinfonica hubenil na Aruba uzando Scol di Musica Rufo Wever como fundeshi, ami a keda entusiasma cu e talento cu e scol a presenta.
E prome acto bou di direccion di Sra. Provence, e chikitinnan tocando marimba tabata impresionante y a pone tur hende ansioso pa scucha mas. Y tabatin hopi mas pa scucha y e muchanan a sigui impresiona.
Den e segundo acto e coro acompaña pa algun tocado di blokfluit a interpreta “Un Chuchubi Preto” di Elvira Arends y a mantene e audiencia entusiasma.
Despues tabata turno di e coro di cantantenan Daniella Wassenaar, Michelle van Vliet y Priscilla Quant y e solista Keya Hassell dirigi pa Sra. Provence cu alabes a acompañanan na piano. Nan a merece y a ricibi un aplauso fuerte.
A sigui dos acto di guitara di studiantenan di e maestro Edwin Kock kende a acompaña su discipulonan. Prome tabata Sabrina Silveira cu Juvenscka Ramirez, sigui pa Megan Jacobs y Tatiana Mansur. Bunita!
E interpretacion di e cancion “Una maquina del tiempo” di Sr. Daniel Werleman tabata bunita, pero ami a keda desapunta cu Sr. Werleman no a scoge un alumno pa canta solo en bes di e mes. Sr. Werleman tin un bunita bos, pero afterall, e Concierto Estudiantil tabata pa propaganda e logronan di e hoben estudiantenan.
Un di e actonan cu ami a gusta mas tabata “Spring” di Antonio Vivaldi toca pa un grupo di 13 tocado di instrumento di cuerda entre 7 aña (Isabel Chang) y 13 aña (Leyla Velazquez). Keltum Tomasouw di 10 aña kende a toca cello a cuminsa apena 5 luna pasa. Srta. Hester Matthijssen por ta orguyoso di e grupo aki. Mi a mira hopi potencialidad den nan.
E siguiente acto, tambe bou direccion di Srta. Matthijssen tabata cu studiantenan di fio mas grandi y acompaña pa varios otro instrumento. Indudablemente, un di e “showstoppers” di e atardi musical.
Un otro tremendo “showstopper” tabata e presentacion di “Sabrosita” un cantica acogedor di Rufo Wever toca pa un conhunto chikito bou di direccion di Johnny Croes kende tambe ta sub-director di Scol di Musica.
E ultimo tres numbernan riba e programa tabata presentacion di tipo di musica cu a haci mi puntra mi mes pakico e organisadornan no a inclui mas musica clasico y di nos propio compositornan. Y pakico a presenta asina tanto musico profesional (cu en berdad ta toca na un nivel halto) den un Concierto Estudiantil.
A base di nan tremendo presentacion, e grupo cu a toca “Spring” di Vivaldi lo ricibi un invitacion di Simon Gollo, e director artistico di Aruba Symphony Festival, pa nan participa den un concierto den luna di October. Posiblemente lo tin invitacion pa algun otro alumno tambe di Scol di Musica Rufo Wever participa den un manera of otro den e Festival.
“Aruba’s got talent” y e Concierto Estudiantil di Scol di Musica Rufo Wever a showcase un poco. E Concierto a mustra cu e scol ta un fundeshi fuerte y cu e proyecto di un Sinfonica Hubenil di Aruba por construi ariba dje. Mi ta felicita tur maestro di Scol di Musica Rufo Wever pa nan logro bunita cu nan alumnonan.
Skirbi pa Clyde Harms